भांगरभूंय | प्रतिनिधी
अग्रलेख
————————-
लोकांच्यो चडश्यो समस्या आसतात त्यो शिक्षण, भलायकी, नोकरी, येरादारी, लायट, उदका संबंदी. ह्या खात्यांच्या मंत्र्यांनी चड कार्यक्षम आसचें पडटा.
————————-
खंयच्याय पक्षाचें सरकार येवं, ताचेर विरोधी फुडारी आनी लोकांचो एक गट बेजार, रागार, फुगार आसताच. हालींसराक सोशल मिडियाक लागून हें चडूच जाणवूंक लागलां. कितलेंय बरें काम केलें तरी एका गटाक तें आवडना आनी दुसरे वटेन अयोग्य काम केलें तरी तें कितलें बरें, हें सांगपीय तयार जाल्यात. खर विरोधाक लागून बरेच राजकी फुडारी सहसा लोकां सामकार वचून तांच्यो समस्या थेट हाताळपाचे भानगडींत पडनात. आरते परते प्रस्न आशिल्ल्यो पत्रकार परिशदो घेवपूय हालींच्या वर्सां उणें जालां. देखून मुख्यमंत्री डाॅ प्रमोद सावंत हांणी सुरू केल्ली ‘हॅलो गोंयकारा’ कार्यावळीची तोखणाय करपाक जाय. दर म्हयन्याच्या पयल्या शुक्रारा सांजवेळा ती पणजी दूरदर्शना वयल्यान प्रक्षेपीत करतले. हातूंत लोकांक आपले प्रस्न विचारपाक मेळटले, तेय बी सेन्साॅर जायनासतना. अशें धाडस दाखोवपी मुख्यमंत्री आमच्या देशांत चड नात. हे कार्यावळींत जितले चड लोक वांटेकार जातले, तितली ती येशस्वी जातली.
30 वर्सां पयलीं एका मुख्यमंत्र्यान भाश्य केल्लें, ‘आपले कडेन येवपी चडशे लोक वैयक्तीक प्रस्नूच घेवन येतात.’ भौशीक प्रस्न आयलेच जाल्यार देणगी, सभाघर, मैदान बांदपा संबंदीचे. लोक पयलीं सावन त्राशिल्ले आशिल्ल्यान घडये ते स्वताचेच प्रस्न घेवन येता आसतले. ‘हॅलो गोंयकारा’ कार्यावळींत चडांत चड भौशीक, राज्या कडेन संबंदीत प्रस्न येवचे. रोखडीच मुख्यमंत्री हेल्पलायन सुरू जावपाची आसा. थंय आपल्यो समस्या मांडपाक मेळटल्यो. मात, हो सगलो उपक्रम येशस्वी करतलो जाल्यार सरकारी खात्यांचो, हेर मंत्र्यांचो, सरकारी कर्मचाऱ्यांचो तेंको तितलोच गरजेचो. कारण निमणें लोकांचे प्रस्न, समस्या, कामां तांकांच करपाचीं, हाताळपाचीं आसात. तींय बी वेळार, ‘फाल्यां यो, परवां यो’ हीं उतरां आतां गुठलावन मेजाच्या ड्राॅवरांत उडोवचीं.
गोंय तशें सगले बाबतींत सुदारिल्लें आसा. म्हणून समस्या आसच्योच नात, अशें ना. रोजगाराची व्हडली समस्या अजून सतायता. गोंयांतलीं बारीक सारीक कामां भायल्यांनी, तांच्या सोयऱ्या- धायऱ्यांनी हातासल्यांत. त्या कामांचे वाटेक सुशिक्षीत गोंयकार आयज आनी फाल्यांय वचतशे दिसना. ताका लागून गोंयकार तरणाट्यांचो कल, आवड वळखून ते तरांचे अभ्यासक्रम, रोजगार राज्यांत हाडचे पडटले. सरकारान राज्य कर्मचारी भरती आयोगा खाला हाचे मुखार उमेदवार वेंचपाचे थारायलां, हो क्रांतिकारी आनी खूबच धाडसी निर्णय. कारण वशिलो, लांच, भ्रश्टाचार हीं राजकी मळाचीं आंगां जाल्यांत आनी तांकां कसलेच तरेची बादा येवची ना हाची जतनाय राजकी फुडारी आनी समाजूय घेता. जाचें सादता तो राजा, उरिल्ल्यांनी स्वताक आनी प्रशासनाक दोश दित दीस काडपाचे. ‘हॅलो गोंयकारा’ कार्यावळींत मुख्यमंत्री डाॅ. सावंत एका तरणाट्याक, हाचे मुखार गुणेस्त, पात्र उमेदवाराकूच नोकऱ्यो मेळटल्यो, आतां खंयचेंच खातें उमेदवार भरचें ना, अशें उतर दिलें. त्या तरणाट्यान नोकऱ्यां बाबतीत कितें जाता तें सांगतना एका मतदारसंघाचें नांवूय घेतलें. सुज्ञांक चड सांगपाची गरज ना.
लोकांच्यो चडश्यो समस्या आसतात त्यो शिक्षण, भलायकी, नोकरी, येरादारी, लायट, उदका संबंदी. ह्या खात्यांच्या मंत्र्यांनी चड कार्यक्षम आसचें पडटा. पोरण्यो येवजण्यो सारक्यो चालीक लावपाचेर तांणी पयलीं भर दिवप गरजेचो. मागीर नव्यो येवजण्यो, प्रकल्प हाडूं येतात. वाचप्यांनी स्मरणशक्तीक ताण दिल्यार, साबार येवजण्यो, प्रकल्प याद जातले, जांचें उक्तावण, लोकार्पण जाल्लें, मात ते प्रत्यक्षांत केन्ना सुरूच जावंक नात. तांचेर आतां मेरेन अब्जांनी रुपया खर्च केला आसतलो. आयज पर्यावरण दीस. जमनी सोंपल्यो, दोंगरुय सोंपत आयल्यात, आतां दोंगर, अभयारण्यांतली जमीन सांबाळुया. नाजाल्यार सैमा खातीर जगप्रसिद्ध आशिल्लें गोंय बोडकें जातलें आनी ताचो व्हडलो धपको पर्यटन मळाक बसतलो. गोंयची पाचवेंपण सांबाळप सरकाराच्या हातांत आसा. गोंय भलायकेचें, शिक्षणाचें केंद्र करूं येता. उदका बाबतींतूय (म्हादय सयत) खूब कितें करपाचें उरलां, गोंयांक आनीक वीज जाय, वीज यंत्रणां, उपकेंद्रां वाडोवपाक जाय. येरादारी – अपघात हीय एक व्हडली समस्या…. तश्यो लोकांच्या समस्या सोंपनात, पूण त्यो उण्यो- उण्यो जावच्यो… हातूंतच सरकाराचें खरें जैत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
