भांगरभूंय | प्रतिनिधी
सगळ्यांत पयलीं इश्टागत दिसाचीं (Friendship Day) समेस्तांक परबीं. ऑगस्ट म्हयन्यांतलो पयलो आयतार इश्टागत दीस म्हूण मनयतात. तुमकां कळपाक जाय की इंग्लीश म्हणी प्रमाण, friend in need is a friend indeed… संकश्टाच्या वेळार पावता तो खरो इश्ट. एक इश्ट वा इश्टीण, जाचे कडेन आमी आमच्या मनांतल्या सगळ्या गजालीं विशीं मुक्तपणान उलोवंक शकतात. खरो इश्ट २४ वरां आपल्या इश्टाच्या कल्याणाचो विचार करता. हें तुमकां खबर आसा? इश्टागतीचोय एक दीस आसपाक जाय अशें कोणाच्या मनांत आयलें?
इश्टागत दीस केन्ना मनयतात?
इश्टागत दीस कोणे मनोवपाक सुरवात केली तें तुमकां खबर आसा? हो इश्टागतीचो दीस सगळेच आपल्या इश्टां वांगडा मनयतात. भारत आनी अमेरिके सारक्या देशांनी ऑगस्टाच्या पयल्या आयतारा इश्टागत दीस मनयतात जाल्यार अमेरिकेंत ३० जुलयाक आंतरराष्ट्रीय इश्टागत दीस मनयतात. १९९८ वर्सा संयुक्त राष्ट्रांनी ३० जुलय हो आंतरराष्ट्रीय इश्टागत दीस म्हूण जाहीर केलो. उपरांत संयुक्त राष्ट्रांचे बसकेंत २०११ वर्सा ऑगस्ट म्हयन्याचो पयलो आयतार इश्टागत दीस म्हूण जाहीर केलो.
इश्टागत दीस मनयल्यार लोक, देश, संस्कृताय आनी लोकां मदीं मोग आनी शांतताय निर्माण करपाक मदत जातली. इश्टागत दीस एका सेतू प्रमाण काम करतलो. आंतरराष्ट्रीय इश्टागत दीस अधिकृतपणान ३० जुलयाक मनयतात. पूण जायत्या देशांनी हो दीस वेगवेगळ्या दिसांनी मनोवपाचें थारायतात. अमेरिकेंत आनी भारता सारक्या देशांनी ऑगस्टाच्या पयल्या आयतारा इश्टागत दीस मनयतात.
इश्टागत दीस कोणें मनोवपाक सुरवात केली?
इश्टागत दिसाची कल्पना पयलेच खेपे जॉयस हॉल हांणी १९५८ वर्सा केल्ली. जॉयस हॉल हे हॉलमार्क कार्ड्स कंपनीचो संस्थापक आशिल्ले जे इश्टागतीच्या बंधना वयल्यान प्रेरीत जाल्ले. इश्टांनी आपली इश्टागत आनी मोग वांटून घेवचो आनी हो दीस एकठांय मनोवचो अशें तांकां दिसतालें. मिस्टर हॉलाची ही कल्पना लोकांक आवडली, मागीर ल्हवू ल्हवू लोकांनी इश्टागत दीस मनोवपाक सुरवात केली. ते उपरांत पुराय संवसारभर इश्टागत दीस मनोवपाक लागले.
इश्टागत दिसाचें म्हत्व कितें?
इश्टागत फकत खंयच्याय पिराये पुरती मर्यादीत ना. खंयचेय पिरायेचेर जेन्ना आमी आमच्या इश्टां वांगडा बसून मुक्तपणान उलोवंक शकतात, आमचे विचार वांटून घेवपाक शकतात, आमचे विचार उक्तावंक शकतात, खरी इश्टागत जेन्ना फुडलो मनीस आपले विशीं कितें विचार करतलो हाचो विचार करिनात हीच आसता. इश्टागतींत लोक एकामेकांक आसात तशेच स्विकारतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
