‘हॅपिनेस इंडेक्स’ वाडोवपाचो यत्न

भांगरभूंय | प्रतिनिधी

मुख्यमंत्री : पोरणे गोंया वांटले ‘म्हजें घर’चे अर्ज

भांगरभूंय । प्रतिनिधी

माशेल : आमचें सरकार गोंयांतल्या लोकांचो ‘हॅपिनेस इंडेक्स’ वाडोवपाचो यत्न करता. गोंयांतल्या लोकांक तांच्या घरांचे मालकी हक्क नियमीत करपाक आनी फुडले पिळगेक शांततायेन रावपाक मेळचें, हे खातीर गोंय सरकारान ‘म्हजें घर’ येवजण सुरू केल्या, अशें मुख्यमंत्री डॉ. प्रमोद सावंत हांणी सांगलें.

पोरणें गोंय पंचायत सभाघरांत ‘म्हजें घर’ येवजणेचे अर्ज वांटपाची कार्यावळ आयोजीत केल्ली. ह्या वेळार मुख्यमंत्री उलयताले. हे कार्यावळीक गोंय पुनर्वसन म्हामंडळाचे अध्यक्ष आनी कुमारजुंवेचे आमदार राजेश फळदेसाय, उत्तर गोंय जिल्होधिकारी अंकीत यादव, उपजिल्होधिकारी भिकू गांवस, पोरणें गोंयची सरपंच मेधा पर्वतकार, कुमारजुवेंची सरपंच विंदा जोशी, करमळीचे सरपंच कुष्टा सालेलकार, गोलती- नावेली (दिवाडी) सरपंच मारियो पिंटो, सांत इस्तेवची आदली सरपंच आनी सध्याची पंच स्मिता सावंत, सां- माथायस (दिवाडी) उपसरपंच रुपेश होमखंडी आनी कुमारजुंवें भाजप मंडळ अध्यक्ष योगेश पिळगांवकार हाजीर आशिल्ले.

मुख्यमंत्र्यान सांगलें, मनीस आपले जिणेंत एकूच घर बांदता. फुडले पिळगेक तें हस्तांतरीत करचें, अशें ताचें सपन आसता. हेच खातीर आमी ही येवजण सुरू केल्या, जे वरवीं लोक आपल्या घरांत सुसेगादीन रावपाक शकतले. मनीस जल्माक येतना कांयच घेवन येना आनी वतना लेगीत कांयच घेवन वचना. ते खातीर आपूण सगल्यांक उलो मारता, हे येवजणेचे अर्ज घेयात. अधिकारी आनी पंचायत वांगडी तुमच्या अर्जाची प्रक्रिया आनी कागदपत्रां तयार करपाक मजत करतले. विरोधकांनी हे येवजणेक विरोध करपाचो यत्न केलो, जी सामान्य लोकांक आपलें घर नियमीत करपाची संद दिता. ही येवजण खंयच्याय एका समाजा खातीर वा धर्मा खातीर ना, ती सगल्या गोंयकारां खातीर आसा.

राजेश फळदेसाय हांणी मुख्यमंत्री आनी तांच्या पंगडाचे उपकार मानले. तांणी सांगलें, हे येवजणेक लागून खूब जाणांचें सपन साकार जालां. लग्नाच्या वेळार घरा संबंदांत खूबश्यो समस्या उप्रासतात. केंद्रीय गृह मंत्री अमीत शाह हांणीय गुजरातांत अशीच येवजण चालीक लावपाची इत्सा उक्तायल्या. मुख्यमंत्री सदांच सामान्य लोकांच्या हिताचो विचार करतात. ही येवजण म्हणल्यार तंच्या विचारांची फळश्रुती आसा. अन्न, कपडो आनी घर ह्यो मुळाव्यो गरजो आसात. त्यो मेळोवन दिवपाचें स्रय भाजपाक वता.

जांचीं घरां कोमुनिदाद जमनीचेर वा सरकारी जमनीचेर आसात, तशेंच 1972 आदलीं खासगी जमनीर बांदिल्लीं, पूण अनधिकृत थारिल्लीं घरां आशिल्ल्या लोकांक आतां हीं घरां नियमीत करपाक मेळटलीं. खूबश्या कुटुंबांक खूब त्रास सोंसचे पडटाले. विधानसभा अधिवेशनांत ही गजाल मांडली, पूण विरोधकांनी ताका विरोध केलो. आतां लाखांनी कुटुंबांक ‘म्हजें घर’ येवजणे खाला आपलें घर आनी ताचे मालकी हक्क मेळपाक शकतले, अशें फळदेसाय हांणी सांगलें. खूब काळ पडून आशिल्ल्या पीडीए प्रस्नाचेर उलयतना फळदेसाय हांणी सांगलें, हो प्रस्न फुडल्या स म्हयन्यां भितर निकालात काडपाचें आपूण आस्वासन दितां. हे संबंदांत आपूण सेगीत मुख्यमंत्र्यांच्या संपर्कांत आसा.