भांगरभूंय | प्रतिनिधी
ते आसूं. ते क्रिएटीव बी. हांव लेखक न्ही. सद्या हांव कार्लूश रूई झफॉन ह्या स्पॅनीश कादंबरीकाराची द शॅडो ऑफ द विंड ही कादंबरी वाचतां.
धनूक फोन केलो. खबरी मारपाक ज्यार्दिनांत यो म्हूण. फोन उखललो आनी ये…………. (खूब वेळ षड्ज लावचो तसो आवाज लायलो ताणे) येतां रे………..(परत रे हो ऋषभ स्वर लायलो).
कितें जालां कळना जालें. सदच्या सोप्यार वचून बसलों. खरशे खरशेत धनू आयलो.
आरे तुका जालां कितें…. एक एक उतर अशें दोन दोन मिनटां ओडून शें धरता…. कितेंय आरोग्याचो उर्फ भलायकेचो उर्फ साउदीचो इश्यू उर्फ प्रॉब्लेम आसा जाल्यार दोतोरागेर या मरे.
कांय ना रे. दोन दिसांची गुंगी ती.
म्हळ्यार…. हांवें विचारलें.
आरे काणकोणा पर्तगाळ गेल्लों. अनुप जलोटाच्या गाण्याक. ताणें पळे, ऐसी लागी लगन, मीरा हो गयी मगन… ही गझल गातना…
भजन रे तें… हांवें म्हळें
भजन काय अभंग तें आसूं रे… आयक पयलीं. ताणें अशें आवर्तन घेतलें म्हणून सांगूं… पेटी बी तोच वाजयतालो. तुवें आनी हांवें तशी तान मारल्यार आवरो उडपाचो. वो तो गली गली म्हणत गली………….. आरे, ली दोन मिनटां दामून धरलें. मदींच स्वर असो ल्हव केलो. मडगांवच्या फोंडकुलांवेळार आमी गाडी अशी स्लो करतात तशी. सगळें काणकोण स्वांस रोखून. मागीर घब्ब करून घेतलें.
धनू, आतां कळ्ळें. तूं उतर कित्याक ओडटा तें. प्रभाव, परिणाम तो. प्रॅक्टीस कर रे. पूण सांबाळून. खाडकी वाळू पेंचून वांकडी बी जायत.
म्हाका मरे कोंकणीचें चिंतून चिंतून हुसक्यांनी जीव आकूळ पिकूळ जाता. न्हीद खळटा.
कित्याक रे टेन्शनां घेता ह्या वयार… ते थंय सुखीच आसा…
सद्या नाटकांच्या मळार पळे जें कितें चललां तीं नाटकां पळोवन हें साध्य केलें अशें जाता.
धनू, दुख्खी जावं नाका रे.
तुजे ते पॉझिटीव्ह चिंतनाचे शेरमांव पुरो जाले. एक दोन न्ही कितलेशेच इश्यू. तरी बरें चर्चा बी जाता ती तांच्या भितर चार पांच लोकां भितरूच जाता म्हूण.
कोण्णाक आपयनात तर रे…
तुका मरे सगलें खबर आसा. म्हाका सगळें उलोवंक लावं नाका. बाकीच्या लोकांक म्हळ्यार विरोधकांक ताळयो मारपाक आयती संद मरे ही.
धनू, चड चिंतूं नाका रे. जांणी सगळें धोणू उर्फ धनुष्य उखललां ते शांत थंड आसा. कोंकणी वयर सरता ती पळोवं नजो कांय लोकांनी. पुरो तो विशय. कितलोय घश्टी तितलोच. तू इफ्फीक बी गेलोना….
मडगांवच्यान पणजे वचपाक नाका जाता रे. हांगां गोमंत विद्या निकेतन सभाघरांतल्या कार्यावळीकूच वचपाक एकेकदां जिवार येता. उपस्थिती ताका लागून कमीच जाता हालींसराक.
हय रे. नुस्तें पेटोवन ताणून दितकच उठपाक जाता पांच. मागीर आसूं कशें जाता…
सद्या कितें वाचता तूं….
म्हाका मरे वाचना बगर चैन पडना. थोड्यांक पुस्तकां पळेल्यारूच घुंवळ येता.
कांय लेखक बी आसात तातूंत.
ते आसूं. ते क्रिएटीव बी. हांव लेखक न्ही. सद्या हांव कार्लूश रूई झफॉन ह्या स्पॅनीश कादंबरीकाराची द शॅडो ऑफ द विंड ही कादंबरी वाचतां.
कशी कितें आसा…… आमच्या कादंबरीचे तुळेन.
टेरर. क्लासिक. ताणें 9 कादंबऱ्यो बरयल्यो. जगभर सगल्या भाशांनी अणकारीत जाल्यात.
आर्रा, आमचे लेखक पांच स बारकेल्यो कादंबऱ्यो बरयतात मरे. व्हडले व्हडले पुरस्कार.
तें आसूं रे. तुवें भरभरून तें कितें कमी जावपाचें आसा. हे कादंबरींत कथेंत कथा अशे तरेन विणल्यात की वाचक गुंग जावन वता.
कापाज मरे हो लेखक. आमचीं कथानकां लिनियर, एक रेशीय. हें सॉलीड मरे धनू.
तुका जाय वाचपाक….
म्हाका ना रे पाशेंस इतल्या बारीक अक्षरांची इंग्लीश वाचपाक. दोळ्यांक त्रास. लेखक वाचिनात. हें जागतीक वाचून खंय वचपाचें आसा…
ही कादंबरी कितली खपल्या खबर आसा…
प्रिंट ऑन डिमांड… आसतली 3 हजार.
तीन कोटी खप जाला. ते कादंबरी विशीं खबर नासप आनी ती वाचिल्ली नासप ही एक ख्यास्त.
हाचो अर्थ आनीक शंबर गजालीं विशीं ज्ञान नासप म्हणजे शंबर अपराधांची शिशुपाला भशेन ख्यास्त पडपाची मरे धनू. चलो. ह्याच नेटार डायरेक्ट तात्यागेर या. सुकी भाजी पुरी मारपाक…
वासुदेव पै
मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
