भांगरभूंय | प्रतिनिधी
2024 त रस्तो अपघातांत 286 जाणांक मरण
भांगरभूंय । प्रतिनिधी
पणजी : गोंयांत 1 जानेवारी ते 31 डिसेंबर 2024 ह्या काळांत 2,682 रस्तो अपघातांत 286 जाणांक मरण आयलें. तातूंत हुस्क्याची गजाल म्हणल्यार 35 वर्सां परस उणे पिरायेच्या 130 जाणांक मरण आयलां. ही टक्केवारी 45.45 इतली आसा. तातूंत 113 दादले जाल्यार 17 बायलांचो आस्पाव आसा. ही म्हायती येरादारी पुलीस विभागाच्या 2024 तल्या वर्सुकी विश्लेशण अपघात अहवालांतल्यान मुखार आयल्या.
वर्सुकी विश्लेशण अपघात अहवाला प्रमाण गोंयांत 2024 त जाल्ल्या 286 जाणांक अपघातांत मरण आयलां. ही आंकडेवारी पळयत जाल्यार 2023 वर्साचे तुळेंत 5.76 टक्के चड म्हणल्यार 164 अपघात जाल्यार अपघाती मरणां 1.38 टक्के म्हणल्यार 4 मरणां उणीं आयल्यांत. 2023 त 2,845 अपघातांनी 290 जाणांक मरण आयिल्लें. ते भायर गोंयांत 2024 त 1,041 जाण जखमी जाल्ले. तातूंत 888 दादले जाल्यार 153 बायलांचो आस्पाव आशिल्लो. 2024 त जाल्ल्या अपघाती मरणांत सगल्यांत चड 45 ते 60 वर्सां पिराय गटांतले 69 आशिल्ले. ही टक्केवारी 24.12 इतली आसा. ह्याच पिराय गटांतले 140 जाण जखमी जाल्ले. जाल्यार 18 वर्सां पिराय गटांतल्या स भुरग्यांक मरण आयलां. ही टक्केवारी 2.09 इतली आशिल्ली. जाल्यार ह्याच पिराय गटांतले 21 भुरगे जखमी जाल्ल्यात. 18 ते 25 पिराय गटांतले 21.32 टक्के म्हणल्यार 61 जाणांक मरण आयिल्लें. ह्याच पिराय गटांतले 224 जाण जखमी जाल्ले. 25 ते 35 पिराय गटांतले 22.02 टक्के म्हणल्यार 63 जाणांक मरण आयिल्लें. ह्याच पिराय गटांतले 315 जाण जखमी जाल्ले. 35 ते 45 वर्सां पिराय गटांतले 17.81 टक्के म्हणल्यार 51 जाणांक मरण आयिल्लें. जाल्यार ह्याच पिराय गटांतले 256 जाण जखमी जाल्ले. 60 आनी ताचे परस चड पिराय गटांतल्या 36 जाणांक मरण आयिल्लें. जाल्यार त्याच पिराय गटांतले 84 जाण जखमी जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
