भांगरभूंय | प्रतिनिधी
भांगरभूंय । प्रतिनिधी
बेळगांवः कर्नाटक विधासभा वेंचणुकेचे फाटभुंयर गोंयांतल्यान कर्नाटकांत चोरयां सोरो व्हरपाच्या प्रकारांत वाड जायत आसा. बेळगांवच्या अबकारी कार्यालयाच्या पंगडान हुक्केरी लागीं 33 लाख रुपया मोलाचो गोंयांत तयार केल्लो सोरो जप्त केलो. अबकारी कार्यालयांतल्या ज्येश्ठ अधिकाऱ्यांच्या मार्गदर्शना खाला सोमाराक सांजे 4 वरांचेर घातिल्ल्या ह्या छाप्यांत पॉस जॉन ब्रिलिन्स सिंगल माल्ट 450 लीटर व्हिस्की जप्त केली. केए 01 एएम 8938 ह्या महिंद्रा पीकअपींत घालून व्हिस्कीचीं 50 बॉक्सात व्हरताले.
पीकअपीचो ड्रायव्हर धर्मेंद्र जहागीर हाका अबकारी अधिकाऱ्यांनी अटक केल्या. हुक्केरी अबकारी विभागाच्या अबकारी निरीक्षकांन ज्येश्ठ अधिकाऱ्यांच्या मार्गदर्शना खाला ही कारवाय केली. कर्नाटक विधासभा वेंचणूक लागीं पावल्ल्यान गोंयांतल्या सोऱ्याची बेकायदेशीर येरादारी जातली हे गृहीत धरून अबकारी अधिकाऱ्यांनी चेक नाक्यांनी तपासणी खर केल्या. फाटल्या पंदरा दिसांत कांय लाखांचो सोरो जप्त केलां. फाटल्या 18 मार्चाक खानापूरच्या अबकारी अधिकाऱ्यांनी 3,905 लीटरांची सोऱ्याची 700 बॉक्सां जप्त केल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
