भांगरभूंय | प्रतिनिधी
मडगांवः तीन म्हयन्यां पयलीं नुवेची समंथा फर्नांडीस (30) हिका उज्यांत लासून मरण आयिल्लें. तेन्ना हुंड्या खातीर सासमांयन केल्लो छळ असह्य जाल्ल्यानूच तिणें आत्महत्या केल्ल्यान तिचे आड खुनाचो गुन्यांव नोंद करचो, अशी मागणी समंथाच्या आवयन केल्ली. तशेंच मागणी पुराय जायमेरेन कूड सिकारचे नात, अशी शिटकावणी दिल्ली. आतां ह्या प्रकरणांत मायणा -कुडतरी पुलिसांनी सासमांय पॅट्रोसिना फर्नांडीस हिचे आड गुन्यांव नोंद केला. मजगती, तीन म्हयन्यां पसून समंथाची कूड मड्याकुडींत आसा
30 ऑगस्ट दिसा लासून घेवन समंथान जीण सोंपयिल्ली. समंथाच्या आवयन हुंड्या खातीर सासमांयन आपले धूवेचो छळ केल्ल्याचो आरोप केल्लो. कुटुंबियांनी तिची कूड लेगीत स्विकारूंक नाशिल्ली. आतां तीन म्हयन्यां उपरांत मायणा-कुडतरी पुलिसांनी सासमांय पॅट्रोसिना फर्नांडीस हिचे आड गुन्यांव नोंद केला.
मूळ सां झुजे द अरियालची समंथा हिचें सात वर्सां पयलीं नोएल हाचे कडेन लग्न जाल्ले. ह्या दोगांकूय एक चार वर्सांचो चलो आसा. घोव नोएल परदेशांत कामाक आसता. जाल्यार समंथा आनी तिची धूव सासमांय वांगडा नुव्यां रावताली. समंथाची आवय अॅना मारिया डायस हांणी दिल्ले कागाळे प्रमाण हुंड्या खातीर सासमांय समंथाचो सेगीत छळ करताली. समंथान कुळारा हो प्रकार सांगिल्लो. हे घडणुकेच्या एक दीस पयलीं 29 अॉगस्टाक तिणें कुळारा (आवयक) फोन करून सासमांयन उज्याचे चटके दिल्ल्याचे सांगिल्लें. तशेंच हाची म्हायती कोणाक दिल्यार जिवेशी मारपाची धमकीय दिल्ली. ह्या प्रकारा वयल्यान 30 वेर सासमांय आनी सून हांचे मदीं झगडीं जाल्ली. ह्या वेळार सासमांयन समंथाक मारपेट करपाक सुरवात केली. हातूंत समंथान तिका कुशीक धुकलून स्वताक उजो लावन जीण सोंपयली.
वयले कागाळे उपरांत पुलिसांनी गुन्यांव नोंद करूंक नाशिल्लो. ताका लागून डायस हांणी समंथाची कूड स्विकारपाक न्हयकार दिल्लो. तेन्नाच्यान तिची कूड मड्याकुडींत आसा. ह्या प्रकरणांत डायस हिणें दक्षीण गोंय जिल्हो पुलीस अधिक्षकांक निवेदन सादर केल्ले. ताचे पयलीं मुख्य सचीव, गृह खातें, पुलीस म्हासंचालक आनी मडगांव पुलीस उपअधिक्षकांक तांणी निवेदन दिल्लें.
ह्या प्रकरणांत मडगांवच्या न्यायदंडाधिकाऱ्यांनी चवकशी करून निमाणो निवाडो दिला. ते प्रमाण, सासमांय पेट्रोसिना हिचे आड हुंड्या खातीर छळ करून सुनेक अात्महत्या करपाक प्रवृत्त केल्ले प्रकरणांत मायणा -कुडतरी पुलिसांनी गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
