भांगरभूंय | प्रतिनिधी
फ्रान्सीस सार्दिनः उमेदवारी मेळ्ळ्यार लोकांनी सांगात दिवचो
भांगरभूंय । मडगांव
गोंयांत रोखडीच लोकसभा वेंचणूक जातली. ते खातीर काँग्रेस पक्षा कडेन दक्षीण गोंय तिकेटीची मागणी केल्या. पक्षान उमेदवारी दिली जाल्यार उदरगतीच्या कामांच्या आदाराचेर परतून एकदां लोकां कडेन मतां मागपाक येतलों. लोकांनी आपल्याक सांगात दिवचो, अशी मागणी दक्षीण गोंयचे लोकसभा खासदार फ्रान्सीस सार्दिन हांणी केली. तशेंच आपणे काँग्रेस पक्षाक सांगलां, हे खेपे उमेदवारी दिली जाल्यार आपूण वेंचणूक लडोवपाक इत्सूक आसा. ही आपली निमाणी वेंचणूक आसतली, अशेंय तांणी सांगलें.
रिवणां सिमेतोरीच्या कामाचें उक्तावण खासदार सार्दिन हांचे हस्तुकीं जालें. ह्या वेळार ते उलयताले. हे सिमेतोरीचें काम खासदार निधींतल्यान करतले.
वेंचणुको लागीं पावतात तेन्ना चडसो आपूण खंयच्याच कामाची सुरवात करिना. पूण लोकांचे मागणे वयल्यान ह्या कामा खातीर बुन्यादी फातर बसयिल्लो. जिल्होधिकारी कार्यालयांतल्या कागदोपत्री सोपस्कारांक लागून ह्या कामाक सुरवात करपाक कळाव जालो. पूण काम सुरू जाले उपरांत कंत्राटदाराक बेगिनात बेगीन काम पुराय करपाक सांगलें आनी ताणें तें काम जाता तितले बेगीन पुराय केलें, अशें सार्दिन हांणी सांगलें. गांवची उदरगत करपाची आसत जाल्यार ते खातीर शंबर लोक लेगीत उणें पडटात, पूण गांवांतली उदरगतीचीं कामां बंद उडोवपाक दोन समाजविद्वट्टे पुरो जातात. हें खूब खेपे दिसता. पूण गांवांत अशे तरेची वृत्ती ना आनी ताका लागुनूच हें काम बेदीन पुराय जालें. गांवांत आनी कसलीं उदरगतीचीं कामां करपाची आसा जाल्यार आनी निधी उरला जाल्यार तिंवूय करतले. गांवची उदरगत करचे खातीर सगळ्यांनी एकठांय येवपाची गरज आसा, अशें सार्दिन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
