भांगरभूंय | प्रतिनिधी
बेंगळुरु, खबरां संस्था ः बेंगळुरूच्या सर्जापूरांत बिरेस्तारा (15 फेब्रुवारी) एके बायलेन आपले 14 वर्सां पिरायेचे नातीचे 24 वर्सां पिरायेच्या चल्या बरोबर जबरदस्तीन लग्न लायलें. हे विशीं चलयेच्या आवय- बापायक कांयच म्हायती नाशिल्ली. नेण्टे चलयेचे बेकायदेशीर लग्न लायिल्ल्यान पुलिसांनी आजयेक अटक केल्या. ह्या प्रकरणांत आजये सयत अजून 8 जाणांचेर पुलिसांनी आनी बाल संरक्षण विभागान गुन्यांव नोंद केला.
चलयेचे आवयन सर्जापूर पुलिशेंत कागाळ दाखल केली. तिणें पुलिसांक सांगलें, तिची धूव नेण्टी आसा आनी तिचें लग्न हलसिंकाईपुराच्या विनोद कुमारा कडेन जबरदस्तीन लायलां. कैवारच्या यल्लम्मा देवळांत चलयेची आजी, काका, काकी आनी चल्याच्या आवय- बापायचे हाजिरेंत लग्न जालें.
दाखल केल्ले कागाळीचेर आदारून चलयेचे आजयेक अटक करून न्हवऱ्या सयत थंय हाजीर आशिल्ल्या 8 जाणांचेर आयपीसी 366 (अपहरण) आनी बालविवाह प्रतिबंधक कायद्या खाला गुन्यांव दाखल केल्ल्याचें पुलिसांनी सांगलें.
जिल्लो बाल संरक्षण खात्याची वकील गीता हांणी सांगलें, चलयेचे तिचे संमती बगर लग्न जालें. सध्या तें आठवेंत शिकता. ह्या प्रकरणांत भटजी सयत लग्नांत हाजीर आशिल्ल्या सगळ्यांक आरोपी मानतले. शाळेक सुटी आशिल्ल्यान चली आजयेच्या घरा रावपाक आयिल्लें, तेन्ना आजयेन हे कर्म केलें.
फुडाराच्या घोवाची निवड करपा विशीं चलयेची आवय आनी आजी हांचे मदीं परत परत झगडीं जाताली अशें पुलिसांनी केल्ले मुळावे चवकशेंतल्यान दिसून आयलां. धुवेक बुद्द शिकोवपाक तिडकिल्ले आजयेन हें लग्न लायलें, अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
