भांगरभूंय | प्रतिनिधी
रिफॉर्मर्स संघटणाः लोकशाय काबार करपाचें कारस्थान
भांगरभूंय । प्रतिनिधी
म्हापशें: भाजपा केंद्र सरकारान हाडिल्लो नवो हीट अॅण्ड रन कायदो तशेंच भारतीय न्यायीक संहिता आनी हेर कायद्यांतली पुनर्रचना ही हुकूमशायेक घटसाण दिवपाचें कारस्थान आसा. ह्या कायद्यांतल्यान सरकार लोकशाय काबार करपाक सोदता. लोकांक भंय आनी नियंत्रणा खाला दवरपाची ही चाल आसा, असो आरोप करून ही सगळी पुनर्रचना फाटीं घेवची, अशी मागणी रिफॉर्मर्स हे समाजीक न्याय संघटणेन केल्या.
शुक्रारा म्हापश्यां आयोजीत पत्रकार परिशदेंत संघटणेन वयली मागणी केली. ह्या वेळार अॅड. अविनाश भोसले, सुभाष केरकार, अमृत आगरवाडेकार, मिलन वायंगणकार आनी हेर पदाधिकारी हाजीर आशिल्ले. हे संबंदांत रिफॉर्मर्स संघटणे वतीन मुख्य सचिवां सयत संबंदीत प्राधिकरणांक निवेदनां सादर करतले, अशीय म्हायती दिली.
ह्या पदाधिकाऱ्यांनी ह्या कायद्याचे पुनर्रचनेचो निशेध केलो. फक्त म्हाल व्हरपी ट्रक चालक वा बस चालकां खातिरूच हो कायदो मारक ना, जाल्यार सर्वसामान्य तशेंच असुरक्षीत वर्गा आड आशिल्ल्याचो दावो तांणी केलो.
अॅड. अविनाश भोसले हांणी सांगलें, हीट अॅण्ड रन कायद्यांतले पुनर्रचनेचो मुळांत हेतूच कळना. गरीब वा असुरक्षीत वर्गांतले लोकूच घरसंवसार चलोवपा खातीर वाहन चालकाचो वेवसाय वेंचतात. तांकां नव्या हीट अॅण्ड रन कायद्या वरवीं काबार करपाचें हें कारस्थान आसा. हो कायदो आसूं वा भारतीय न्याय संहिता 2023, भारतीय नागरी संरभण संहिता 2023, भारतीय पुरावो विधेयक 2023स हे कायदे लोकांच्या गळ्याक धरचे खातीर केल्यात, असो आरोप आनी टिका अॅड. भोसले हांणी सरकाराचेर केली.
सुभाष केरकार हांणी सांगलें, मोदी सरकारान आपल्या कार्यकाळांत खूबश्या कायद्यांनी दुरुस्ती केल्या आनी स्वताचे मर्जे प्रमाण तातूंत बदल केले. हे चडशे दुरुस्तीचे मसुदे आदीं स्थायी समिती मुखार मांडूंक नात वा ताचेर संसदेंत चर्चा जावंक ना. चर्चा टाळचे खातीर विरोधी पक्षाच्या खासदारांचें निलंबन करून हीं विघेयकां मंजूर करून घेतलीं, असो आरोप तांणी केलो.
नवे कायदे लोकांक मारक आशिल्ल्याचो दावो
केंद्र सरकारान हालींच कायद्यांची पुनर्रचना करून भारतीय न्याय संहिता, भारतीय नागरी संरक्षण संहिता आनी भारतीय पुरावो विधेयक हाडलें. मात ह्या कायद्यां वरवीं तें लोकशाय काबार करपाक सोदता. एके तरेन भंयाचें आनी पुलीस राज हाडपाची ही चाल आसा. हे कायदे लोकां खातीर मारक आसात. नवो हीट अॅण्ड रन कायदो ही ताची जिवी देख आसा, असो दावो रिफॉर्मर्स संघटणेन केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
