भांगरभूंय | प्रतिनिधी
अपघातांत दुचाकी चालकाक मरण, दुबावितांचो पुलीस घेताले सोद
म्हापशेंः दाडाची वाडी- धारगळे म्हाल येरादारी रिक्शान दुचाकीक फाटल्यान धपको दिल्ल्यान दुचाकी चलोवपी देविदास उर्फ देवू कोनाडकार (47) हाका मरण आयलें. अपघाता उपरांत रिक्शा चालकान पळ काडलो. हो खून आशिल्ल्याचो दावो करून थळाव्या लोकांनी सुमार स वरां नागझर जंक्शना वयलो रस्तो आडायलो.
मजगती, दाडाचीवाडी धारगळे हिट अँण्ड रन अपघातांता उपरांत रिक्षे सयत पळून गेल्ल्या दोगां दुबावितांक वारखंड रस्त्याचेर पुलिसांनी अटक केल्या. ह्या अपघातांत देविदास उर्फ देवू कानोळकार (47) ह्या दुचाकी चालकाक मरण आयिल्लें.
हो अपघात आयतारा रातीं सुमार साडेबारा वरां मजगतीं जालो. मेळिल्ले म्हायती प्रमाण, देवू कोनाडकार आनी दुबावीत रिक्शा चालक आनी भितरले दोग जाण मेळून चवगां मदीं वाद जाल्लो. तिडकीन दुबावीत रिक्शा चालकान देवू हाचो फाटलाव करुन दुचाकीक फाटल्यान नेटान खर धपको दिलो. ते उपरांत देवू हाका दुचाकी सयत सुमार 20- 25 मिटर ओडून व्हेलो. हाका लागून देवू गंभीर जखमी जावन जाग्यारुच ताका मरण आयलें. अपघाता उपरांत म्हाल येरादारी रिक्शा सयत भितरले तिगांयनी घडणूक सुवाते वयल्यान पळ काडलो.
ही म्हायती मेळटकच पेडणें पुलीस घडणूक सुवातेर पावले. उपरांत जखमी जाल्ल्या देवूक कासारवर्णें भलायकी केंद्रांत दाखल केलो, पूण दोतोरांनी ताका मरण आयिल्ल्याचें जाहीर केलें. मरण आयिल्लो देवू टॅक्सी चालक आशिल्लो. हे घडणुकेची म्हायती गांवांत आनी टॅक्सी चालकां मदीं पातळ्ळे उपरांत सुमार शंबर टॅक्सी चालक घडणूक सुवातेर हजर जाले. रस्त्यार गाडयो उब्यो करुन तिडकीन ह्या लोकांनी मोपा विमानतळाचो रस्तो आडायलो.
हो अपघात न्हय तर खून असो दावो लोकांनी केलो. घडणूक सुवातेर व्हड प्रमाणात पुलीस हजर जाले. पुलीस अधिक्षक अक्षत कौशल, उपअधिक्षक जीवबा दळवी, निरिक्षक सचिन लोकरे, नारायण चिमुलकार हांणी तिडकिल्ल्या लोकांक समजावपाचो यत्न केलो. सोमारा सकाळीं 10 वरां मेरेन दुबावितांक अटक करपाचें उतर दिले उपरांत लोकांनी रस्तो सोडलो. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
