भांगरभूंय | प्रतिनिधी
डाॅ. प्रमोद सावंत
मुख्यमंत्री, गोंय,
स्थलांतरण गोंयांत वाडटा हें मेकळेपणान सांगतना रोजगारांत कोंकणीची सक्ती कित्याक? हो विशय गोवा मराठी अकादमीचे माचयेर मांडपाची धिटाय दाखयली. तुमकां आनी सरकाराकय परबीं. राजभास दिसाचे कार्यावळींत हालींच तुमी भांगरभूंय वाटावपा पासत उलो माल्लो, शणै गोंयबाबांचे भुंयेंत रोजगारांत कोंकणीची सक्तीची कित्याक तेंय सांगलें. हींच तुमचीं उतरां गोंय, गोंयकांरां पासत मोलादीक. खिणाभितर न्यूज भांगरभूंयतल्यान तीं गोंयकारां मेरेन पावली.
फुडारांत जे माचयेर वतले तांकां कोंकणीची व्हडवीकाय सांगत रावात, तीच तुमकां फुडारांत जैता मेरेन पावयतली. परतून एकदां तुमकां एकच सांगचेंशें दिसता, “ बी फर्म, फाटीं सरचें न्हय ”. उतरांचेर ठाम रावात, कोणेय कितलेंय मागलें तरी राजभास कायदो बदलपाचो, रोजगारा पासत नेमावळींत बदल करपाचो विचार करुं नाकात.
गोंय मुक्तीच्या संगरा इतलेंच राजभास कोंकणीचें झुज वर्सांनी वर्सांचें. त्या झुजाच्यो गाथा पुस्तक रुपान लोकांमेरेन पावल्यात, तुमचे कडेनूय तीं पुस्तकां आसात.
स्थलांतरण तशें संवसारीक अरिश्ट, अमेरिके वरी राश्ट्र ते पासत कायदे करता. म्हासत्ता म्हणून तेंच राश्ट आमचे भारतभूंये कडेन पळयता. म्हासत्ता जाता तेन्ना गोंयां वरी ल्हान राज्य मुखार वतलें जाल्यार रोजगारांत कोंकणीची सक्ती होच उपाय. राजभासेंतल्यान म्हणल्यारुच मायभासेंतल्यान मुळावें शिक्षण दिवपाच्या वावराकय आतां बळगें मेळटलें अशी आस्त बाळगीतां. पुस्तकां कोंकणीत आसात, अंकलिपीय आसा, डिक्शनरी कितल्योश्योच आसात.
कोंकणीची हनुमान उडी म्हाविद्यालया मेरेन पावल्या, म्हाविद्यालयांत प्राध्यापकांनी रोजगारा पासत भुरगीं घडोवचीं पडटलीं, रोजगार नीती विद्यार्थ्यांक शिकोवची पडटली. मामलेदार पावंड्या वेल्यान सरकाराचे सचीव जाल्ले स्वप्नील नाईक, प्रसाद लोलयेंकार, निखील देसाय, यतिंद्र मराळकार, संजीत राॅड्रिग्ज, संदीप जॅकीस, अमरसेन राणे हांच्यो देखी तुमकां दिवच्यो पडटल्यो. भुरग्यांतली कुशळताय वळखुपाक शिकात हेंय सांगात. फुडें वचात, फाटीं नाका.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
