भांगरभूंय | प्रतिनिधी
नील नितीन मुकेशः कलाकार तंत्रज्ञांनी सादलो पत्रकारां कडेन संवाद
भांगरभूंय । खबरां मेज
पणजीः ‘हिसाब बराबर’ हो चित्रपट म्हणल्यार एक सामान्य मनीस आनी एक व्हड यंत्रणा हांचे मदलो संघर्श आसा, अशें मिकी मेहता ह्या खलनायकाची भुमिका केल्लो नील नितीन मुकेश हांणी सांगलें.
इफ्फीच्या सातव्या दिसा ‘हिसाब बराबर’ ह्या चित्रपटांतले कलाकार आनी तंत्रज्ञांनी पत्रकार परिशदेंत प्रसार माध्यमां कडेन संवाद सादलो. पीआयबी मिडिया सेंटरांत ही पत्रकार परिशद जाली.
‘हिसाब बराबर’ ही भारतीय रेल्वेंतल्या मेहनती तिकेटचेकर राधे मोहन शर्मा हांची कथा. हें पात्र नामनेचो अभिनेतो आर. माधवन हांणी साकारल्या.
चित्रपटाचे निमाते शरद पटेल हांणी चित्रपटाचें वर्णन करतना सांगलें, हो चित्रपट एक गंभीर संदेश दिवपी, विडंबन. हो चित्रपट पळयले उपरांत प्रेक्षकांक तांच्या बँक वेव्हाराचो इतिहास जतनायेन पळोवपाची प्रेरणा मेळटली. अभिनेत्री किर्ती कुल्हारी हिणें सांगलें, ह्या चित्रपटांत ती एक कठोर पुलीस अधिकारी आसा. तिच्या ह्या पात्राक एक रॉमेंटीक कोन आसा. रेल्वे प्रवासा वेळार हो कोन विकसीत जाता. ही भुमिका करतना खूब खोस मेळ्ळी. ह्या सिनेमा वरवीं आपल्या लक्षांत आयलें, आपूण कसलेंय पात्र साकारपाक शकता आनी ‘हिसाब बराबर’ हें निश्चीत ते दिशेन पावल मारपाची आपल्याक संद दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
