…हिवूय सक्ती जाय

भांगरभूंय | प्रतिनिधी

पं. जवाहरलाल नेहरू हांच्या मंत्रीमंडळांतले खांपे फुडारी, देशाचे पयले गृहमंत्री सरदार वल्लभभाई पटेल हांचे जयंती निमतान देशभरांत दक्षता जागृताय सप्तकाचें आयोजन जावपाचें आसा. ते निमतान जागृताय कार्यावळी करप सक्तीचें केलां. योग दीस मनयलो तेन्नाय योगासनां करुन ताचे फोटो, व्हिडियो धाडपाक सांगिल्लें. सरकारी यंत्रणांक केंद्र सरकाराक घडये हाचो अहवाल धाडचो पडटा आसतलो. कारण ती केंद्राची कार्यावळ. सरकारी कर्मचाऱ्यांक ही सक्ती करप सगल्यांकूच योग्य दिसलां आसतलें. मात, हेर बाबतींतूय सरकारी, निमसरकारी कार्यालयांचेर सरकाराचें लक्ष जाय, अशें म्हणल्यार कोणाचो पापड मोडचो ना, अशी आस्त.
सरकारी कार्यालयांनी सगलेच आळशी, फटींग, भ्रश्टाचारी, गुन्यांवकार नात. पूण थोडे आसात, हें पुराव्यान सिद्ध जालां. कारण दर म्हयन्याक एकलो तरी बडतर्फ, निलंबीत जाता. म्हणटकच हांगा कुस्कुटाचो पसून भ्रश्टाचार, आळस, गैरकारभार जायना, असो दावो कोणें करचो न्हय. लोक फक्त कागाळ करपाक भियेतात इतलेंच! प्रामाणीकपणान वागचें, कामां थारावीक वेळांत पूर्ण करचीं, कचेरेंत आयिल्ल्यां कडेन प्रसन्न मुखामळान उलोवचें, येवपा- वचपाच्यो वेळो पाळच्यो… अश्या कांय गजालींचीय सक्ती करूं येता. न्हय करचीच. दक्षता सप्ता इतलेंच हेंय म्हत्वाचें! कितें आरोप जातात कर्मचाऱ्यांचेर? कचेऱ्यांनी फायल मुखार धुकलपाक पयशे मागतात, नोकरी, परवान्यां खातीर बोगस कागदां करप, निविदांनी चड खर्च दाखोवप, ‘च्या- पाण्या’क टक्केवारी मागप, निलंबीत करून मागीर गुपचूप कामार घेवप, थेट काम करिनासतना एजंटां वतीन कामां करप, मुद्दाम आडोवन दाखोवन चिरीमिरी घेवप, उसरां येवप आनी बेगीन वचप, कामचुकारपणा, वशिल्यान वर्साचीं वर्सां एकाच जाग्यार रावप….. असले प्रकार जावचे नात, हाची दक्षताय सरकारी सायबांनी घेवं येता. खूब कठीण काम हें, पूण अशक्य न्हय!
भ्रश्टाचाराक आळाबंद हाडूं येता. कोणाक तापयनासतना, हें काम जावं येता. ज्या कार्यालयांनी चड लोक येतात, थंयच्यो 100 टक्के सेवा डिजिटल, आॅनलायन करच्यो. सर्व्हर बंद आसा, नॅटवर्क मेळना, असलीं कारणां मात कोणे सांगचीं न्हय. बऱ्योच सरकारी सायटी, ताचे वयले चडशे फोन चलनात. (मुद्दाम फोन करून पळोवचें.) येवजण्यांचे अर्ज, निविदा, परवाने, नुतनीकरण आॅनलायन करचें. जाय जाल्यार कचेरेंतलेच दोन कर्मचारी ते खातीर बसोवचे. स्वराज्य संस्था आॅनलायन जोडल्यात, ही बरी गजाल. सगल्या कामांक वेळाची मुजत घालची. थारायिल्ल्या वेळांत वा दिसांनी फायल हाता मेकळी जावंक ना जाल्यार कर्मचाऱ्याक 100 रुपया दंड. कर्मचारी, अधिकारी दोशी सिद्ध जालो, जाल्यार ताका निलंबीत करचे बदला, घरा धाडचो. हें मनीसपणा भायलें दिसता जाल्यार ताका शिटकावणी दिवन कामार दवरचो, पूण 10 वर्सां भत्तो, इंक्रिमेंट, बडटी दिवची न्हय. कायद्यांत ही तजवीज ना जाल्यार ती करची.
दक्षता आयोग चड बळिश्ट जावंक जाय. राजकी हस्तक्षेपा बगर स्वतंत्र तपास, कारवाय जाल्यार बरी. राज्य वा देश पांवड्या वयल्यान कोणेय फोन केल्यार पसून तपास अधिकाऱ्यांनी खंबीर रावचें. नागरिकांक कागाळ करपाक टोल- फ्री हेल्पलायन आसात. त्यो चड सक्रीय जावच्यो. भ्रश्टाचार, गैरप्रकारां आड आवाज काडपी ‘व्हिसल ब्लोअरां’क राखण दिवची. तांणीय आवाज काडटना फक्त समाज सेवा होच एकसुरो उद्देश नदरे मुखार दवरचो. ‘कॅग’ अहवालांतल्या प्रकरणांची चवकशी जावची. सरकारी खात्यांचें, म्हामंडळाचें आॅडीट जावप गरजेचें. कर्मचारी उसरां येतात म्हूण सीसीटीव्ही, बायोमेट्रिक्स प्रणाली सुरू केल्या. ताची दर म्हयन्याक तपासणी जावची. जंय भ्रश्टाचाराक चड संद आसा, थंयच्या अधिकाऱ्यांची बेगीन बदली जातली हाची खबरदारी सरकारी यंत्रणेन घेवंक जाय. लोकांच्या गरजेच्या कामांची सक्ती सरकारी कर्मचाऱ्यांचेर करीत जाल्यार उदरगतीची गती वाडटली.