भांगरभूंय | प्रतिनिधी
निरंकालांतलो गवळीवाडो. हो एक सुपुल्लो वाडो. चडशे धनगर भाव, भयणी हांगा राबीतो करतात. दुदाची तान भागोवपाक तांच्या गोठ्यांत म्हशी, गायो आसतात. गवळीवाड्याच्या सरभोंवतणी दोंगुल्ल्यो, लांबच्या लांब मळां आसात. फांतोडेर दूद काडटकूच गोरवां, म्हशींक गवळी ते दोंगुल्लेचेर वा पाचव्याचार मळार चरपाक सोडटात. दिसभर पोट टम्म जातकूच सुर्य अस्तमते वेळार ल्हवू ल्हवू सगलीं गोरवां आपसूक हांबेत, गळ्यांतल्यो घांटी वाजयत गवळीवाड्यार परततात.
पावसाच्या दिसांनी वा शिरवण म्हयन्यांत पाचवेचार सैमाच्या सांगातान गोरवां, पाडकाक चरतना पळोवप म्हळ्यार म्हाका सर्गसुख कशें भासता. मनाक एक वेगळीच खोस भोगता. कारण असलो देखाव आतां सहसा दिसना.
पूण, खरी मजा येता ती गवळी लोक बोकडांक चरोवपाक व्हरतात तेन्ना. गवळीवाड्यार जितलीं बोकडां आसात तांकां एकाच पंगडान चरोवपाक व्हरतात. दर एकल्याक आठवड्यांतलो एक दीस थारायिल्लो आसता. त्या दिसा सगळ्या बोकडांक सांबाळपाची जापसालदारकी थारायिल्ल्या गवळ्याची आसता.
निरंकाल ते फोंण्या वतना लागता तो हो वाठार खुबूच सुंदर आसा. आडमेळीं मोडणां, वळणां घेयत तुमी ह्या मार्गा वेल्यान भोंवडी करतात तेन्ना सैमाचे विंगड विंगड अविश्कार तुमकां तोंडांत बोटां घालपाक लायतात. पावसाळी दिसांनी पाखां फुलोवन बेधुंद नाचपी मोर तुमकां येवकार दितात. तर बोंडला अभयारण्यांत पळयिल्ले, पुण आंगापिंडान भरिल्ले गवे तुमच्या काळजाचो ठोको चुकयतात.
म्हाका बोकडांक घेवन चरपाक वचपी गवळ्याचें पोर नाजाल्यार गवळी पळोवपाक खोस भोगता. शंबरा वयर बोकड्यांक घेवन फांतोडेर गवळी लोक भायर सरतात आणि तिन्हीसांजच्या वेळार परततात. वाटेर जर तुमकां, “हिर्रा, वागान खांव तेका…ह य, हिराप्पा” असो कुकारो आयकूंक आयलो, काय समजुपाचें, बोकडांचो पंगड सरभोंवतणी खंयतरी चरपाक आयला.
शंबर बोकडांक एकाच वेळार सांबाळप म्हळ्यार खांवचें काम न्हय. ते खातीर गवळ्यांनी पोशिल्ले चार ते पांच गावठी कुत्रे ह्या बोकडा वांगडा आसतात. एक बोकड जरी पंगडा भायर वचत जाल्यार भोकून भोकून ते कुत्रे बोकडांक पंगडांत परत घेवन येतात.
एक पोरणी लांब पँट, लांब हाताचो बुशकोट आनी माथ्यार प्लास्टिकाची टोपी असो भेस गवळी भाव बोकडांक चरपाक व्हरतना करतात. लांब पँट, लांब हाताचो शर्ट घालीत जाल्यार जळारां, मुसांचो त्रास उणो जाता. ताका लागून ते असलो भेस करतात. बायलो आसल्यार णववारी साडयेंत दिसतात.
फोंडा ते निरंकालाचे सैमीक फाटभूंयेचेर भोंवडी करत जाल्यार तुमची भोंवडी यादगार थारतली हातूंक मात्तूय दुबाव ना!
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
