भांगरभूंय | प्रतिनिधी
सुभाष फळदेसायः देन दिसांचे विभागीय कार्यशाळेचें उक्तावण
भांगरभूंय । डीआयपी
पणजीः हिमोफिलिया आनी दिव्यांगां मदीं कुशळटायेची खूब तांक आसा. तांच्या उपचारा खातीर समाजान मजत करपाची गरज आसा, अशें समाज कल्याण मंत्री सुभाष फळदेसाय हांणी सांगलें.
3 जूनाक दोनापावलाच्या गोवा इंटरनॅशनल सेंटरांत हिमोफिलिया म्हासंघान (भारत) आयोजीत केल्ल्या दोन दिसांचे विभागीय कार्यशाळेचें फळदेसाय हांणी उक्तावण केलें. ते उपरांत ते उलयताले.
हिमोफिलिया आनी दिव्यांग दुयेंस, हिमोफिलिया आनी दिव्यांगां खातीर समान हक्क, उपचार आनी सुविधांनी सुदारणा अशा विशयांचेर जागरुकताय निर्माण करप हो हे कार्यशाळेचो उद्देश आसा.
हिमोफिलिया आनी दिव्यांगांच्या कल्याणा खातीर उपक्रम चालीक लावपाची गरज आसा. हालींच गोंयांत आयोजीत केल्ल्या पर्पल उत्सवा सारक्यो कार्यावळी आयोजीत करून अशा लोकांक उर्बा दिवपाची गरज आसा, अशें फळदेसाय हांणी सांगलें.
गोंयांतलीं सगळीं विद्यालयां दिव्यांग विद्यार्थ्यां खातीर सुलभ आनी सोयीचीं करतले. हिमोफिलिया आनी दिव्यांगां खातीरचे उपचार तशेंच दुयेंसा विशीं समाजांत जागरुकताय करपाची गरज आसा, अशें गोंय राज्य दिव्यांग आयोगाचे आयुक्त गुरुप्रसाद पावसकार हांणी सांगलें.
हिमोफिलिया म्हासंघ (भारत)चे अध्यक्ष प्रेमरूप आल्वा हांणी म्हासंघा वतीन हिमोफिलिया दुयेंसींच्या कल्याणा खातीर करतात त्या वावराची म्हायती दिली.
ह्या वेळार मंत्री फळदेसाय हांचे हस्तुकीं यादस्तिकेचें प्रकाशन जालें. हिमोफिलिया म्हासंघ (भारत)चे संस्थापक अशोक बी. वर्मा हांच्या उगडासाक ह्या वेळार आर्गां ओंपलीं.
विभागीय मंडळाचे अध्यक्ष बळसीराम गडवे नी पणजी फांट्याची अध्यक्ष सरिता चव्हाण आनी गोंय, महाराष्ट्र, छत्तीसगड, मध्यप्रदेश आनी गुजरात राज्यांचे प्रतिनिधी कार्यशाळेंत वांटेकार जाल्यात. ज्येश्ठ पत्रकार आनी हिमोफिलिया मंडळाच्या पणजी फांट्याचे समन्वयक प्रकाश कामत हांणी सुत्रसंचालन केलें. म्हासंघाचे उपाध्यक्ष रामू गडकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
