हिमालयांतलो अजंठा – ताबो बौद्ध मठ
भांगरभूंय | प्रतिनिधी
अजंठाचें नांव संवसारीक पर्यटन नकाशांत नोंद
नवी दिल्ली, खबरां संस्था ः महाराष्ट्रांतल्या अजंठातल्या गुहांत शेंकड्यांनी वर्सां पयलींची आशिल्ली चित्रां संवसारीक दायज वळेरेंत आस्पावला. देखून अजंठाचे नांव संवसारीक पर्यटन नकाशांत नोंद जाला. अजंठा लेणीं भशेन सोबित आशिल्ली ही भित्ती चित्रां प्राचीन ताबो बौद्ध मठाची वळख हिमालयाच्या अजंठा अशी आसा. हिमालयांतलो अजंठा म्हूण वळख आशिल्लो ताबो मठ हो 10,000 फूट उंचायेचो सगळ्यांत प्राचीन मठ. हो मठ हिमाचल प्रदेशांतल्या लाहोल स्पीती जिल्ह्यांत आसून तिबेटांतलो थोलिंग गोम्पा उपरांत दुसरो म्हत्वाचो पवित्र मठ मानतात.
हो मठ इ.स. 996 वर्सा विद्वान भिक्षू लोचावा रीन्ग्चेन जन्गपो रत्नाभद्र हाणें बांदलो. ह्या मठांत 9 देवळां आसून तांच्यो वण्टी सोबीत चित्रांनी सजयल्यात. तातूंत बौद्ध धर्माचें जिणेचें चित्रण आसा. हांगा खूब पुर्विल्लीं बौद्ध ग्रंथ आसात आनी पांडू लिपीय हांगा मेळ्ळां. 1996 वर्सा ह्या मठाक 1000 वर्सां पुराय जाली.
हो मठ रेंव, माती आनी विटांनी बांदिल्लो आसलो तरी वण्टी मातयेचो आसात. विशेश म्हळ्यार हे वण्टीचेर काडिल्ल्या चित्राचे रंग आयज लेगीत ताजे आसात. ताचेर बर्फाचो वा पावसाचो परिणाम जावंक ना. हांगा दर चार वर्सांनी चाहर मेला जाता.
ह्या मठाच्या वण्टींचेर आशिल्लीं चित्रां देवदेवतांनी एकेच रातींत काडिल्लीं अशें म्हण्टात. देखून हो मठ दैवी आशीर्वाद मानतात. 1975 वर्सा भूंयकांपा उपरांत नवो प्रार्थना हॉल बांदला. हो मठ भारताच्या पुरातत्व विभागाच्या अधिकाराखाला येता. युनेस्कोन संवसारीक दायज वळेरेंत ताचो आस्पाव केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
