भांगरभूंय | प्रतिनिधी
धारमपूर (हिमाचल प्रदेश): मंडी जिल्ह्यांतल्या सियाथी गांवांत मध्यानरातीं दोंगर कोसळपाचे घडणुकेंतल्यान 63 जाण वाटावले आनी ताचें पुराय श्रेय सुण्याच्या सादूरपणाक आनी ताच्या धनयाच्या शिटूकसाणीक वता.
कांय दिसां आदीं रातीं 12:30 ते 1:00 वरां मजगतीं ही घडणूक घडिल्ली. पावसाक लागून जमनीक वेरो पडटाल्यो. त्या वेळार ललित कुमाराच्या घराच्या तळमजल्यार न्हिदिल्लो ‘रॉकी’ नांवाचो पांच म्हयन्यांचो सुणो अचकीत भोंकपाक लागलो. आवाज आयकून ललित कुमार जागो जालो. ताणें सकयल वचून पळयलें तेन्ना ताका वण्टीक वेरो पडटात आनी घरांत उदक भितर सरता तें दिसलें.
म्हजो सुणो सामको विचित्र रितीन भोंकतालो, जशें तो कितें तरी संकेत दिता. हांव ताचे कडेन गेलो तेन्ना वण्टींतल्यान उदक भितर सरतालें, अशें ललित कुमार हांणी सांगलें. कळाव करिनासतना ललित कुमार धांवून सकयल देंवलो आनी कुटुंबा सयत लागसारच्या लोकांक जागोवंक लागलो. उंचायेर आशिल्ल्या घरांतल्यान ताका दोंगराची माती आनी उदक नेटान गांवाचे दिशेन येता तें दिसलें.
उपरांत तांणी आनी शेजाऱ्यांनी घराघरांनी वचून 22 कुटुंबांक सादूर केलें. सगळे वेळार घरां आनी सामान सोडून सुरक्षीत सुवातेर धांवले. कांय मिण्टां भितर आवाज करीत दोंगर कोसळ्ळो आनी माती, उदक येवन 12 घरां नश्ट जालीं.
रॉकी फकत पांच म्हयने पिरायेचो. ताका तीन म्हयन्यां आदीं ललित कुमारान आपल्या भावा कडल्यान (संधोल, मंडी हांगाच्यान) हाडिल्लो. लोकांक आपोवपाच्या बोवाळांत कोणाचेंच लक्ष रॉकी कडेन गेलें. तो स्वता आडकून उरिल्लो, मागीर लोकांनी ताका सुरक्षीत थळाचेर हाडलो.
सध्या घडणुकेच्या सुवाते सावन सुमार 500 मीटर अंतराचेर आशिल्ल्या त्र्यंबला गांवांतल्या नैनादेवी देवळांत बाधित कुटुंबांनी आलाशिरो घेतलो. थळाव्या लोकांनी आनी प्रशासनान मजतीचो हात दिला. दरेका कुटुंबाक तत्काळ मजत म्हणून 10 हजार रुपया दिल्यात. हे दुर्घटनेंतलो हिरो राॅकीक पळोवपाक, ताचे व्हिडियो काडपाक सगले कडल्यान लोक येवपाक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
