भांगरभूंय | प्रतिनिधी
जीन्स, टीशर्ट घालपाचेर बंदीः हिमाचल सरकाराचो निर्णय
हिमाचल प्रदेश, खबरां संस्थाः राज्य सरकारान सरकारी कर्मचाऱ्यां खातीर ड्रेस कोड लागू करुन कार्यालयीन शिस्तीचेर भर दिलां. जारी केल्ल्या आदेशा प्रमाण, कार्यालयांत जीन्स आनी टीशर्ट घालपाचेर बंदी घाल्या. नेम मोडपी लोकां आड शिस्तभंगाची कारवाय जातली अशेंय आदेशांत म्हणलां.
कार्मिक विभागान सगल्या प्रशासकीय सचीवांक, विभाग मुखेल्यांक आनी विभागीय आयुक्तांक हे नवे नेम खरपणान चालीक लावपाचे निर्देश दिल्यात. हाचे पयली 2017 वर्सा अशीच सुचोवणी जारी केल्ली, पूण जायते कर्मचारी तांचेर पाळो दिना अशें दिसून आयलें.
नव्या नेमा प्रमाण कर्मचाऱ्यांनी कार्यालयांत आसतना वा न्यायालयीन कामकाजा वेळार सादे आनी औपचारीक रंगाचो पोशाख घालप सक्तीचें केलां. दादल्या कर्मचाऱ्यांनी शर्ट-पँन्ट वा कॉलर आशिल्लो शर्ट घालप सक्तीचें, जाल्यार बायलां कर्मचाऱ्यां खातीर साडी, फॉर्मल सूट, सलवार-कमीज, चुरीदार वा दुपट्टा आशिल्लो कुर्ता घालप सक्तीचें आसा.
सरकाराचो ह्या निर्णया फाटल्यान भौशीक सेवेंत शिस्त, सभ्यता आनी प्रतिश्ठा तिगोवन दवरपाचो हेत आसा अशें स्पश्ट केलां. तशेंच कर्मचाऱ्यांच्या सोशल मिडियाचे वागणुकेचेर नियंत्रण दवरपाचेय निर्देश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
