भांगरभूंय | प्रतिनिधी
डेहराडून, खबरां संस्था : हिमाचल प्रदेशांत ढगफुटी जाल्या. तशेंच उत्तराखंडांत घोग्यांनी पावस झडला. ह्या वेळार जाल्ल्या विवीध घडणुकां मदीं उत्तराखंडांत १२, जाल्यार हिमाचल प्रदेशांत ४ नागरिकांक मरण आयलें. जाल्यार ५० बेपत्ता आसात. हिमाचल प्रदेशांत खुबशीं घरां मोडल्यांत, तशेंच पूल आनी रस्ते व्हांवून गेल्यात.
कुलूंत निर्मंड, सैंज आनी मलाना जाल्यार मंडीच्या पधर आनी शिमलाच्या रामपूर गांवांत ढगफुटी जाली. सुत्रांनी दिल्ले म्हायती प्रमाण, मनाली-चंडीगड म्हामार्गार पालसणां कोसळिल्ल्यान येरादारी ठप्प जाल्या. बियास न्हंयेचें उदक पुलार आयलां. पावसाक लागून आपोलांच्या बागायतींचेंय व्हडा प्रमाणांत लुकसाण जालां, अशी म्हायती राज्याचे महसूलमंत्री जगतसिंह नेगी हांणी दिली.
उत्तराखंडांत पावसाचेर सांवार
उत्तराखंडांत पावसाचेर सांवार आयला. बुधवारा रातभर पडिल्ल्या पावसाक लागून एकाच कुटुंबांतल्या तीन जाणां सयत १२ जाणांक मरण आयलां. जाल्यार स जाण जखमी जाल्यात. खुबशीं घरां मातये भरवण जाल्यांत. हुंवाराक लागून न्हंयाच्या उदकाची पातळी वाडिल्ल्यान धरणांतल्या उदकाचो विसर्ग करचो पडला. ताका लागून हुंवार आयला अशी म्हायती अधिकार्यांनी दिली. हरिद्वार जिल्ह्यांत स, टिहरी तीन, देहरादूनांत दोन जाल्यार चमोलीत एका नागरिकाक मरण आयिल्ल्याची म्हायती सुत्रांनी दिली. नैनिताल जिल्ह्यांत एक सात वर्सां पिरायेचो चलो न्हंयेंत व्हांवून गेल्ल्याचें सुत्रांनी सांगलें.
मजगतीं, हुंवाराच्या वाठारांनी एनडीआरएफ, एसडीआरएफचे पंगडत तैनात केल्यात. राज्यांतल्या अलकनंदा आनी मंदाकिनी ह्यो दोन मुखेल न्हंयो धोक्याचे पातळेचेर व्हांवतात अशी म्हायती सुत्रांनी दिली.
यात्रेकरूंक आडयले
बुधवारा रातीं झडिल्ल्या पावसक लागून गौरीकुंड- केदारनाथ म्हामार्गा वेल्यान केदारनाथाक देवदर्शन करपाक वचपी ४५० यात्रेकरूंक आडयल्यात. भीमबलींत पालसणां कोसळिल्ल्यान केदारनाथ मार्गार आडकल्ल्या २०० यात्रेकरूंक सुरक्षीत सुवातेर पावयिल्ल्याची म्हायती आपत्ती सचिव विनोद कुमार सुमन हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
