हिट अँड रन कायद्यांतले नवे तरतुदींचो निशेध: १० राज्यांनी संप
भांगरभूंय | प्रतिनिधी
स्कुल बसी बंद: भोपाळांतल्या ५ शाळांनी सुटी जाहीर
नवी दिल्ली, खबरां संस्था: हिट अँड रन कायद्यांतले नवे तरतुदींचो निशेध करून देशभरांतल्या ट्रक चालकांनी आपलीं वाहनां चलोवपाक न्हयकार दिला. ताका लागून जायत्या सुवातींनी रस्त्याचेर जड वाहनां उबीं आसात. हाका लागून पेट्रोल, डिझेल, भाजीपालो अशा गरजेच्या वस्तूंच्या येरादारीचेर परिणाम जावपाक लागला.
मध्य प्रदेश, राजस्थान सयत १० राज्यांनी पेट्रोल आनी डिझेल पंप सुकिल्ल्याची म्हायती मेळ्ळ्या. हांगा नागरिकांच्यो लांब रांको लागल्यात. फळां, भाजीपालो, दूद आनी शेतकी वस्तूंचे पुरवणेचेर परिणाम जाला. जायत्या सुवातींनी प्रशासन येरादारी परतून सारकी जावपा खातीर येरादारी करप्यां कडेन संपर्क सादता.
अखिल भारतीय येरादारी कॉंग्रेसीचे अध्यक्ष अमृतलाल मदन हांणी ‘वाहतूकदारांनी अजून संप जाहीर करूंक ना. दिल्लींत जावपी बसकेंत हे संबंदी निर्णय जातलो. सध्या फकत ड्रायव्हर गाडयो सोडून देंवतात. हेरांकूय गाडयो चलोवपाक दिनात, अशें तांणी सांगलें.
मध्य प्रदेशाचेर हाचो चड परिणाम जाला. मध्य प्रदेशांतले संघटनेचे अधिकारी विजय कलरा हांणी सांगलें, राज्यांत स लाख ट्रक आसात. देड लाख ट्रक दोन दीस जाले तशेच उबे आसात. औपचारीक घोशणा केल्यार परिस्थिती आनीक वायट जावंक शकता. देशांत ९५ लाख ट्रक आसात. हाचे भायर मध्य प्रदेश, राजस्थान, महाराष्ट्र, हरियाणा, जम्मू-काश्मीर, गुजरात, छत्तीसगड, पंजाब, उत्तराखंड आनी उत्तर प्रदेशांत आयज परिस्थिती वायट जावंक शकता.भोपाळ, इंदौर, ग्वालियर, जबलपूर आनी हेर शारांतल्या बस स्टेशनां वयल्यान बशी चलनात.
इंदौरांत सुमार ९०० बशी बंद आसात. मंगळाराय शाळा बशी आनी शाळा व्हॅन बंद उरतली अशें मध्य प्रदेश शाळा बस सेवा संचालक समितीचे अध्यक्ष शिवकुमार सोनी हांणी सांगलें. राज्यांत वट्ट १.२५ लाखां परस चड शाळेच्यो बशी आनी व्हॅन चलतात. संपाक लागून भोपाळांतल्या ५ शाळांनी २ जानेवारीक सुटी जाहीर केल्या.
हिट अँड रन कायद्यांत कितें बदल केल्यात, विरोध कित्याक आसा?
संसदेन संमत करून चालीक लायिल्ले भारतीय न्यायवेवस्थे संहितेंत हिट अँड रन प्रकरणांत ‘आडनदर जाल्ल्यान मरण’ अशी खाशेली तरतूद केल्या. ते प्रमाण चालकाची आडनदर जावन मरण आयल्यार आनी चालकान पुलीस वा दंडाधिकार्याक कांय सांगिनासतना थंयच्यान पळ काडल्यार १० वर्सांची ख्यास्त आनी ७ लाख रुपया दंड आसा.
आतां मेरेनचो कायदो कितें?
चालकाची वळख पटल्या उपरांत ताचेर IPC कलम २७९ (आडनदर करून वाहन चलोवप), ३०४A (आडनदर जाल्ल्यान मरण येवप) आनी ३३८ (जीव धोक्यांत घालप) खाला गुन्यांव दाखल केला. हातूंत दोन वर्सां बंदखणीची तरतूद केल्या. अपघाता उपरांत वाहन चालक पळून वताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
