भांगरभूंय | प्रतिनिधी
आतां मेरेन, न्हय हो वेळ मेरेन हिंदू म्हण एक उतर आसा. हो हिंदू आतां तरी एक धर्म, मागीर तांतले पंथ, वर्ग आनी वर्ण बी वेगवेगळे बारीक- मोठे विभाग आसात. आयज चालंत आसा, तो जातीबद्ध कुडके- कुडके जाल्लो हिंदू, जाका आमी धर्म म्हण पाचारतात. संवसारांतले सगले धर्म म्हणल्यार रिलीजन, मात हिंदू हो धर्म, पूण रिलीजन न्हय, कारण ताका संस्थापक कोण ना वा ताचे स्थापनेची तारीख ना. ताका ख्रिस्ती पोपा वरीं प्रमुख पोपसायब ना. मात हिंदू हो सिंधूचो अपभ्रंश काय आनीक कितें तें कळपाक मार्ग ना, मात बाळासाहेब ठाकरे हांचे बापूय, प्रबोधनकार ठाकरे, जे त्या तेंपार बंडखोर. ते हिंदूं मदल्या जातीभेदाचेर, वर्णभेदाचेर, वर्गभेदाचेर बी खूबच सणसणीत थापटां मारी. तत्कालीन समाजप्रबोधनाचें कितेंय आसूं. आयज परत एकदा हिंदू शब्दाचेर बरोवपाचो प्रसंग आयला. कारण फर्मागुडयेर सरकारी इंजिनियरींग काॅलेजीच्या ग्रावंडार एक व्हडलो याग वजा जल्मोत्सव म्हणल्यार वाडदीस मनोवपाक सनातन हें संस्थेन हो ब्रह्मोत्सव वा संस्थापक आठवले हांचो 84 वो जल्मदीस आयोजीत केला, अशे कांय फलकां वयल्यान समजता. कोणायचोय जल्मदीस मनोवपाक कोणाची हरकत नासची. आमीय बी तांकां 84 वो हॅपी बर्थडे विश करतात.
सनातनाच्यो गजाली आमी गेलीं साबार वर्सां आयकत आसात. तांगेली जातीबंद मानसिकताय हिंदू धर्माच्या फलकाचेर आमी वाचल्या. सनातनाची पयली वयली आरंभाची जाहीर सभा पणजे आतां कदंब बसस्टॅण्ड आसा, थंय मोट्या दबाज्यान जाल्ली. गोंयभर शेंकड्यांनी हळदुवे बावटे रातयांच लावपाक सनातन संस्था यशस्वी जाल्ली. मोटे उमळशिकेन सनातनाचे ते पयले जाहीर सभेक उपस्थीत राविल्लों, ती जाहीर सभा नेमकी सनातन संस्थेची की राजकी पक्षाची तें कळनाशिल्लें. पूण सुषमा स्वराज ही स्पश्ट बरें हिंदी भाशेंत सभेचें निवेदन करताली. सभेंत कोणकोण उलयिल्ले तें याद जायना. माचयेर गोंयकार कोण कोण आसले तेंवूय याद जायना, मात सभा बरीच जाल्ली. मात म्हजे तकलेत उरली ती तेन्नाची सभेचीं सुत्रां चलोवपी अॅड. सुषमा स्वराज. हीच मागीर भारताची केंद्रीय मंत्री बी जाली.
हे सभेक दुर्जनाचो नाश करपाचो सोपूत दिल्लो. दुर्जनाचो नाश करपाचो विडो तेन्ना सगळ्यांनी खाल्लो. विडो खातात आनी तो रंगताय बी. वता थंय दुर्जनाचो नाश करात अशे पट्टे हड्ड्यार मारून कांय गोंयकार तरणाटे चले, चलयो जात्रा, काल्यांनी आप वावुरपी जावन वतात, देवळांनी लोकांक मार्गदर्शन करतात, तें आमी पळेल्लें. आयज गोंयांत कितलें सज्जन आनी कितले दुर्जन आसात ताचो हिशोब सनातन संस्थे कडेन आसूं येता. पूण उपरांत गोंयांतलो भोवजन जो दुर्जनांचो नाश करात म्हूण प्रचार करतालो, तो उणो जालो. सनातनाच्यो विंगड विंगड काणयो रामनाथी बांदोडेंच्यान भायर पडपाक लागल्यो, वर्तमानपत्रांनीय छापून आयल्यो. ही संस्था आमच्या बांदोड्यांत रामनाथी दोंगरा मुळसा कडेन, आयज ती वयर तेंगशेर पावल्या. बरीच प्रगती केल्या आनी तांगेल्या संस्थापकाचो 84 वो वाडदीस ते 17 ते 19 अशे तीन दीस धुमधडाक्यान फर्मागुडयेर मनयतात. मनोवं बावडे. आमंत्रितां मदीं मंत्री आशिल्ले आमगेले श्रीपादभाऊ आनी मुख्यमंत्री हांचीं नांवांय बी फलकाचेर झळकतात. फर्मागुडयेर गोंय सरकाराच्या इंजिनियरींग काॅलेजीच्या मैदानार सुमार तीस- चाळीस हजार लोक जमतले, अशें कळटा. हो दबाजो नेमको कोणाचो?
हिंदू धर्माचो संस्थापक कोण, स्थापनेची तारीख, वर्स कितें, कोण प्रमुख अशें विचारतकच, फक्त जाप दितात ती हिंदू एक जिणेपद्दत म्हूण. आतां मेरेन ह्या देशात धर्म- धर्म म्हणीत भौसाक शिंगा लावन राज्य करीत आयिल्ले पक्ष, संघटना भोवजन समाजाक मामू करून सत्ते खातीर ‘गर्वसे कहो हिंदू है’ अश्यो घोषणां दित आयल्यात. कितेंय आसू, सनातन धर्म हो हिंदू धर्माचो वेगळो वांटो काय तो वेगळो ब्रह्मधर्म तें रोखडेंच कळटलें. दुर्जनाचो नाश करीत हे सनातनी आतां गोंयांतल्यान कसली क्रांती करता तेंय कळटलें. सनातन संस्था ‘हिंदू राष्ट्र’ हें नांव पुसून ‘सनातन राष्ट्र’ हें नवें नांव घेवपाक सज्ज जाल्या, ही बरी गजाल. ह्या महोत्सवाक बरें मागुया.
एन. शिवदास
फर्मागुडी- फोंडें
94224 17233
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
