भांगरभूंय | प्रतिनिधी
कोची, खबरां संस्था : केरळाचे मुख्यमंत्री पिनराई विजयन हांणी दोन आयएएस अधिकाऱ्यांक निलंबीत केल्यात. आतां प्रशासकीय मळाचेर खवदळ जाला. केरळ उद्देग आनी वाणिज्य खात्याचे संचालक के. गोपालकृष्णन आनी शेतकी उदरगत खात्याचे खाशेले सचीव एन. प्रशांत हे दोन आयएएस अधिकारी वादांत आडकल्ले. उपरांत तांचे आड कारवाय जाली.
गोपालकृष्णन 2013 वर्साच्या बॅचाचे अधिकारी. तांणी ‘मल्लू हिंदू अधिकारी’ नांवाचो व्हॉट्सअॅप गट तयार केलो आनी तातूंत हेर अधिकाऱ्यांक जोडून घेतले. तर एन. प्रशांत हे 2017 बॅचाचे अधिकारी. राज्याचे अतिरिक्त सचीव ए. जयतिलक हांचेर सोशल मिडियाचेर वादग्रस्त पोस्ट घाल्ल्यान ते तीन दिसां सावन वादांत घुस्पल्ल्यात.
केरळाचे मुखेल सचीव शारदा मुरलीधरन हांणी अहवाल सादर केल्या उपरांत मुख्यमंत्री विजयन हांणी दोनूय आयएएस अधिकाऱ्यां आड कारवाय केली. हे कारवायेच्या आदल्या दिसा महसूल मंत्री के. राजन हांणी सांगलें, अधिकाऱ्यांक जाय तशें वागपाक सरकार दिवचें ना. तांणी नेम आनी कार्यपद्दती खाला काम करचें पडटलें.
30 ऑक्टोबराक ‘मल्लू हिंदू अधिकारी’ हो पंगड तयार जालो. ह्या पंगडांत हिंदू आयएएस अधिकारी आशिल्ले. हो गट तयार जाले उपरांत जायत्या अधिकाऱ्यांनी ताका हरकत घेतिल्ल्यान हो गट वरां भितर डिलीट केलो. दुसरेच दिसा गोपालकृष्णनान पुलिसांची कागाळ करून आपलो फोन हॅक जाला अशें सांगलें. फोन हॅक जाले उपरांत ताच्या फोनांत ‘मल्लू हिंदू अधिकारी,’ ‘मल्लू मुसलमान अधिकारी’ अशे गट तयार जाले अशें तांणी सांगलें.
फोन हॅक जावंकूच ना : पुलीस
मजगतीं गोपालकृष्ण हांचो फोन हॅक जाल्ल्याच्या दाव्याची चवकशी करतना ताचो फोन हॅक जावंक नाशिल्ल्याचें कळ्ळें. फोन हॅक केल्ल्याचे पुरावे मेळूंक नात, अशें पुलिसांनी सांगलें. तशेंच गोपालकृष्णान फोन फॉरेंसिक चवकशे खातीर सादर करचे पयलीं जायते फावट ‘फॅक्टरी रिसेट’ केल्लो अशें चवकशे उपरांत स्पश्ट जालें.
निलंबीत करपाच्या आदेशांत सरकारान म्हणलां, धर्माच्या आदाराचेर व्हॉट्सअॅप गट तयार करून अखील भारतीय प्रशासकीय सेवेच्या अधिकाऱ्यां मदीं फूट घालपाचो आनी वण्टी निर्माण करपाचो यत्न जाल्लो दिसता. तशेंच धर्माच्या आदाराचेर अधिकारी वेगळे करपाचो यत्न जाला अशें दिसता.
एन. प्रशांताचेर कारवाय कित्याक?
राज्य अतिरिक्त मुखेल सचीव ए. जयतिलक हांचे विशीं सोशल मिडियाचेर आक्षेपार्ह पोस्ट केल्या उपरांत एन. प्रशांताचेर निलंबन कारवाय केली. ए. जयतीलक आनी एन. प्रशांत हांचे मदीं सरकारी कामां संबंदी वाद जालो. मागीर एन. प्रशांत हांणी सोशल मिडियाचेर ते विशीं अपमानकारक पोस्ट घालपाक सुरवात केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
