भांगरभूंय | प्रतिनिधी
जिनेव्हा, खबरां संस्था ः ब्रिटनांतल्या गिरेस्त हिंदूजा कुटुंबा आड स्विस कोर्टान व्हड निर्णय घेतला. मूळ भारतीय उद्देजक प्रकाश हिंदूजा आनी ताच्या कुटुंबांतल्या हेर तीन वांगड्यांक न्यायालयान साडेचार वर्सां बंदखणीची ख्यास्त फर्मायल्या. घरांतल्या नोकरां कडेन वायट वागणूक केल्ल्याचो आरोप तांचेर आसा. हे आरोप खूब गंभीर मानून न्यायालयान तांका ख्यास्त फर्मायली. पूण तांचे आड आशिल्लो नोकरांची तस्करी करपाचो आरोप न्यायालयान न्हयकारलो.
उद्देजक प्रकाश हिंदूजा हांचे वांगडा ताची घरकान्न कमल, पूत अजय आनी सून नम्रता हांचेर नोकरांची तस्करी केल्ल्याचो आरोप केला. जिनीव्हा शारांत हिंदूजा कुटुंबाचो एक लेकसाइड व्हिला आसा. ताणें आपल्या व्हिलांत एके भारतीय बायलेक कामाक दवरली. तिका खूब उणो पगार मेळटालो. इतलेंच न्हय तर ती हेर खंय कामाक वचची न्हय म्हणून तिचो पासपोर्टय जप्त केलो. तिचे कडल्यान 18 वरां काम करुन घेताले. ताणी त्या बायलेक फकत 7 स्विस फ्रँक (सुमार 6.19 पाउंड) दिले.
हिंदूजा कुटुंबाच्या अत्याचारा विशीं बायलेन पुलिशेंत कागाळ केली. हातूंत घरांतल्या नोकरांच्या पगारा परस सुण्यांचेर चड पयशे खर्च करतात अशें म्हणलां. आपल्या पाळीव सुण्या खातीर वर्साक 8,584 फ्रँक (7,616 पाउंड) खर्च केल्ल्याचो दावो कागाळदार बायलेन केला.
हे प्रकरण न्यायालयांत गेलें तेन्ना कर्मचाऱ्यांचे शोशण आनी ‘अनधिकृत’ रोजगार दिवपाच्या गुन्यांवांत न्यायालयान हिंदूजा कुटुंबाक दोशी थारायलें. तशेंच कर्मचाऱ्यांचे पासपोर्ट जप्त करून तांकां स्विस फ्रँक्स बदला रुपयांनी पेमेंट दिवप, काम सोडपा पसून तांकां आडावप आनी चड वरां काम करपाक लायिल्ल्याच्या आरोपा खाला हिंदूजा कुटुंबाक दोशी थारोवन साडे चार वर्सां बंदखणीची ख्यास्त फर्मायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
