भांगरभूंय | प्रतिनिधी
मोहन आमशेंकारः म्हापश्यां वेदपठण प्रशिक्षणाचो समारोप
भांगरभूंय । प्रतिनिधी
म्हापशें: स्वातंत्र्या उपरांत आयज लेगीत हिंदू समाजाचेर लव्ह जिहाद, भुमी जिहाद, वेवसायीक जिहाद हे सारकीं संकश्टां धुमाकूळ घालतात. आमकां धर्मीक किल्लोसांत घुस्पून 2047 मेरेन भारताचो पाकिस्तान करपाची सपनां कांय अल्पसंख्यांक लोक रंगयतात. हेच खातीर आमी जातीपातीच्यो वण्टी मोडून एकवटांत रावपाक जाय, अशें विश्वहिंदू परिशदेचे गोंय आनी महाराष्ट्राचे अध्यक्ष तशेंच आदले आमदार मोहन आमशेंकार हांणी सांगलें.
म्हापशेंच्या डॉ. दामोदर वाळके सभाघरांत आयोजीत वेदपठण प्रशिक्षण शिबिराच्या समारोप सुवाळ्यांत आमशेंकार मुखेल सोयरे म्हूण उलयताले. ह्या वेळार माचयेर उत्तर गोंय विश्व हिंदू परिशदेचे अध्यक्ष प्रमोद सांगोडकार, शिबिराचे प्रशिक्षक आचार्य प्रसाद देशमुख, संयोजक यशवंत गवंडळकार आनी रुपाली गवंडळकार हाजीर आशिल्ली.
मुगलांनी काशीचो मठ उध्वस्त करून आमची ज्ञानसंपदा आशिल्ली नालंदा आनी तक्षशिला ही विद्यापिठां नश्ट केलीं. वेद, उपनिशदां, पुराणां आशिल्ले ग्रंथ संपदाय लासून उडयली, अशेंय आमशेंकार हांणी सांगलें.
प्रसाद देशमुख हांणी सांगलें, वेदपठण आनी मंत्रोच्चाराक लागून देवा विशीं आमचीं स्रद्धा वाडटा आनी विस्वास लेगीत. वेदमंत्र पठण देवा कडेन नातें जोडपाचें माध्यम आसा. ताका लागून घराघरांनी मंत्रजप जावपाक जाय.
रुपाली गवंडळकार हांणी येवकार दिलो आनी प्रास्तावीक केलें. विजय कवळेंकार आनी अनील नार्वेंकार हांणी आपले अणभव सांगलें. नारायण राटवड हांणी योगसाधक जावपाचो उलो मारलो. डॉ. अरुंधती सडेकार हांणी सुत्रसंचालन केलें जाल्यार विलास पिळणकार हांणी उपकार मानले. ह्या वेदपठण शिबिरांत 80 जाणांनी वांटो घेतलो. ह्या शिबिराचें दुसरें सत्र जानेवारींत घेतलें, अशें आयोजकांनी जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
