भांगरभूंय | प्रतिनिधी
विनायक वळवयकारः पंच आसलो तरी हिंदू आशिल्ल्याचें म्हणणें
भांगरभूंय । प्रतिनिधी
मडगांवः हिंदूंच्यो भावना दुखयल्यार हे फुडेंय आवाज काडटलों. ताचेर कोणाची कसलीय प्रतिक्रिया आयली जाल्यार लेगीत फाटीं सरचों ना. पंच आसलो तरी आपूण हिंदू लेगीत आसा. लोकप्रतिनिधी म्हूण आमी लोकांच्यो समस्या मांडटात, अशें रुमडामळचे पंच विनायक वळवयकार हांणी स्पश्ट केलें.
पंच वळवयकार हांचेर शेनवारा राती चाकवान जिवघेणो हल्लो जाल्लो. ते उपरांत त्या वाठारांत दोन गटां मदीं तणाव निर्माण जाल्लो. हे फाटभुंयेर मडगांव पुलिसांनी सोमारा वळवयकार आनी ताच्या समर्थकांक आपोवन तांचे कडेन चर्चा केली. ते परांत वळवयकार पत्रकारां कडेन उलयताले.
आमकां सगळ्या धर्मांचो आदर आसा. गरज नासतना आमी कोणाचे वाटेक वचनात. पूण धर्मरक्षणा खातीर केन्नाय लडो दिवपाक तयार आसा, अशें वळवयकार हांणी सांगलें.
मजगतीं, रुमडामळ, हावसींग बोर्ड वाठारांतल्या घडणुकांक लागून धर्मीक वाद निर्माण जाल्ल्याचे फाटभुंयेर पंच वळवयकार आनी तांच्या समर्थकांक शांतताय आनी सुवेवस्था राखपाक सांगलें. वळवयकार हांणी ज्यो मागण्यो केल्यात ताचेरूय चर्चेंतल्यान मार्ग काडपाचेर भर दितले. वळवयकार हांचेर जाल्ल्या चाकू हल्ल्यांतल्या दुबाविताक अटक केल्या. एकामेका आड अजून मेरेन कसलीच कागाळ दाखल जावंक ना. रुमडामळ चाकू हल्लो प्रकरणाची चवकशी सुरू आसा. दुसऱ्या गटाक लेगीत आपोवन तांचे कडेन चर्चा करतले, अशी म्हायती पुलीस उपअधिक्षक संतोष देसाय हांणी पत्रकारांक दिली.
बिफाचीं दुकानां बंद करातः वळवयकार
हावसींग बोर्ड वाठारांत चालू आशिल्लीं बेकायदो बिफाचीं दुकानां बंद करचीं. बेकायदो बिफाच्या दुकानांक लागून हिंदू धर्मांतल्या लोकांक त्रास जाता. तशेंच बेकायदो मदरसा सुरू आसात, तांचेर कारवाय करची, अश्यो मागण्यो पंच विनायक वळवयकार हांणी पुलिशे कडेन केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
