हिंदी मजकूराचो कागद जर्मनीच्या फ्ली बाजारांत
भांगरभूंय | प्रतिनिधी
खबरां संस्था ः हालींच एका जर्मन मनशान देवनागरी लिपींत मजकूर आशिल्ल्या पेपरांचे कांय फोटो रेडीटाचेर (reddit) शेअर केल्यात. हॅम्बर्गातल्या फ्ली बाजारांत ताका हीं कागदपत्रां मेळ्ळीं. ह्या फोटोंनी दोन हळडुव्या रंगाचीं पानां दिसतात आनी तातूंत हिंदी वा संस्कृत मजकूर आसा. ह्या वापरप्यान मजकूराचो उगम आनी अर्थ समजून घेवपा खातीर रेडीट समुदाया कडल्यान मजत मागली. ताका लागून जायत्या भारतीयांनी हांचेर प्रतिक्रिया दिवन अजाप उक्तायला.
ह्या जर्मन मनशान रेडिटाचेर ह्या दोन हळडुव्या पानांचे फोटो शेअर केल्या उपरांत नेट वापरप्या मदीं उमेद निर्माण जाल्या. ताणें हें पोस्ट आर/ इंडिया सबरेडिटांत शेअर करुन भारतीय वापरप्यांक हो मजकूर वळखुपाक मजत करपाची विनंती केली. सध्या ताणें हो मजकूर हिंदी वा संस्कृत आसूं येता अशें म्हणलां.
भारतीय रेडिट वापरप्यांनी रोखडेंच मजत करपाक फुडाकार घेतलो आनी हो मजकूर पंचंगाचो (हिंदू पंचांग आनी ज्योतिश पंचांग) अशें वळखलें. जे धर्मीक कार्यावळी आनी विधींचो वेळ थारावपा खातीर वापरतात. पंडित नवल किशोर भार्गव हांच्या मालकीच्या भास्कर प्रेसान हो खाशेलो पंचांग वाराणसींत छापला आसूं येता अशें वापरप्यांनी सांगलें. नवल किशोर भार्गव हे त्या काळांतले नामनेचे प्रकाशक आशिल्लें.
हे नवे म्हायतीचेर प्रभावित जाल्ल्या जर्मन मनशान सगळ्यांचे उपकार मानले आनी विचारलें की हो दस्तावेज दुर्मिळ आसा काय? कांय जाणांनी जाप दिली की ताका अर्थीक नदरेन व्हडलें मोल नासलें तरी ताका सांस्कृतीक म्हत्व आसा. खास करून हो दस्तावेज ताच्या मूळ सुवातीवेल्यान इतलो पयस कसो पावलो ताका लागून ताका आतां खाशेलें म्हत्व मेळ्ळां. हाका लागून जर्मन लोकांनी ह्या पंचांगाचे योग्य रितीन जतन करपाचें थारायलें. तशेंच ह्या दस्तावेजाचें इतिहासीक आनी संस्कृतीक म्हत्व आशिल्ल्यान आमी ताचे जतन करता अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
