भांगरभूंय | प्रतिनिधी
राष्ट्रीय शिक्षण धोरणा प्रमाण, त्रिभाशा सूत्र चालीक लावपी महाराष्ट्र हें देशांतलें पयलें राज्य थारलां. आतां यत्ता पयली ते पांचवेच्या भुरग्यांक हिंदी भाशा सक्तीन शिकची पडटली. हो निर्णय राज्यांतल्या सगल्या मराठी आनी इंग्लीश माध्यमांच्या शाळांक लागू आसतलो. चाळीस वर्सां पयली गोंयांत मुळाव्या शाळांनी हिंदी, इंग्लीश शिकयनाशिल्ले. आतां पयले सावन इंग्लीश आसा. महाराष्ट्रांत अर्थांत भाजपा आनी इश्ट पक्षांनी त्रिभाशा धोरणाक तेंको दिला. मात, मनसे, काँग्रेसी सयत हेर विरोधी पक्षांनी विरोध सुरू केला. सगल्यांत आक्रमक जाल्या, ती राज ठाकरे हांची मनसे. तांचो रोजगाराच्या मळाचेर उत्तर भारतीयांक तसो विरोध आसाच. महाराष्ट्रा फाटोफाट हो निर्णय आतां जून मेरेन हेर राज्यांनीय लागू जातलो. खास करून दक्षीणी राज्यांचेर सगल्यांचें लक्ष आसतलें. कारण थंयचे लोक मायभास, थळावे भाशेचे बाबतींत सामके कडवे. हिंदीक तर तांचो पयलीं सावन विरोध. आतांय राजकी आनी संस्कृतीक मळाचेर तांणी हिंदीक विरोध केला.
आमच्या गोंयांत पयली भाशा कोंकणी वा मराठी (थळावी भाशा), दुसरी खंयचीय भारतीय भाशा आनी तिसरी इंग्लीश सक्तीची आसा. त्रिभाशा सुत्र हांगा लागू जायत जाल्यार कोंकणी वा मराठी मदली एक सोडची पडुये. दुसरी भारतीय भाशा मराठी वा हिंदी वा हेर खंयचीय आनी तिसरी इंग्लीश. पूण मुळाव्या पांवड्यार पांचवी मेरेन हिंदी सक्तीची जायत जाल्यार कोंकणी वा मराठीचो स्वास अंदपाची भिरांत आसा. तातूंत गोंयांत पुर्तुगेज, फ्रेंच, उर्दू, कन्नड शिकपीय आसात. कोंकणी गोंयची राज्यभाशा, नीज गोंयकारांची मायभाशा. म्हणटकच त्रिभाशा सुत्र लागूं जालें काय थळावी भाशा म्हूण गोंय सरकारान मुळाव्या पांवड्यार पयली भाशा म्हूण कोंकणीकूच प्राधान्य दिवपाक जाय.
1968 त राष्ट्रीय शिक्षण धोरणांत भारतीय संस्कृतायेची वळख जावची आनी भोवभाशीकत्व वाडचें म्हूण हें भाशीक सुत्र लागू केल्लें. पयली भाशा मायभाशा वा थळावी भास, दुसरी भाशा हिंदी वा हेर भारतीय भाशा (हिंदी राज्यांनी), हिंदी वा इंग्लीश (बिगरहिंदी राज्यांनी), तिसरी भाशा इंग्लीश वा भारतीय भाशा (हिंदी आनी बिगरहिंदी राज्यांनी). बदलत्या काळा प्रमाण, सगलेंच बदल्लां. तातूंत सक्ती वा मायभाशेचेर संकश्ट येतलें, हे तिडकीन त्रिभाशा सुत्राक विरोध जावंक लागला. अर्थात ताका रोजगार, स्वाभिमान, भायल्यांचो शेक असलीं हेर कारणांय आसात.
केंद्र सरकार म्हणटा, मुळाव्या पांवड्याचेर हिंदी सयत त्रिभाशा सुत्र लागू करपा फाटलो हेतू देशाचो एकचार बळिश्ट करप, भोवभाशीकत्व वाडोवप, लोकांक एकामेकांच्या राज्यांनी वचपाक उर्बा दिवप हो आसा. महाराष्ट्राचे मुख्यमंत्री फडणवीस म्हणटात, ‘संपर्क सूत्र म्हूण हिंदी सक्तीची केल्या, मराठी ही हांगा रावपी सगल्यांक बरोवंक, वाचूंक, उलोवंक येवपाकूच जाय.’ राज ठाकरे म्हणटात, ‘आमी हिंदू, हिंदी न्हय. आमी राज्याचें हिंदीकरण यशस्वी जावपाक कशेच दिवचे नात. हिंदी ही राष्ट्रभाशा न्हयच. सरकारान हो निर्णय फाटीं घेवचो. शिक्षणांत हें सूत्र नाकाच. हिंदी माथ्यार मारपाची आशिल्ली जाल्यार भाशावार प्रांतरचना कित्याक केली?’
राज्यांतल्यान कोट्यांनी रुपया कर केंद्र सरकाराक वता. मागीर केंद्रांतल्यानूय निधी मेळटा. तामिळनाडूचे मुख्यमंत्री एम के स्टॅलिन हांणी हो मुद्दो घेवन भाशा सुत्रा आड आवाज काडला. आमी खंयचेच परिस्थितींत हिंदी, त्रिभाशा सूत्र स्विकारचे नात. आमकां केंद्र सरकारान निधी दिवंक ना जाल्यारुय आमी हिंदीक लागीं घेवचे नात. आमी आमचे मायभाशेची राखण करतले, अशें ते म्हणटात. हे बाबतींत दक्षीणेंत एकमत आसा. तमिळ, मल्याळम, तेलगू जावं कन्नड… तांचें साहित्य, सिनेमा, संगीत, नाटक, कला हिंदी परस चड गिरेस्त. म्हणटकच तांचें हिंदी बगर कांयच अडना. तातूंत ते खर अस्मितायवादी. अमेरिकेक पसून गेल्यार ते आपलो भेस, भास, भूस सोडिनात.
त्रिभाशा सूत्र चालीक लायतना मायभाशे वयलो मोग उणो जातलो, म्हत्व ना जातलें, अशें कांय जाणांक दिसता. ल्हान पिरायेचेर तीन- तीन भाशा शिकतना भुरग्यांचे मानसीक उदरगतीचेर परिणाम जातलो. भुरग्यांनी मुळाव्या पांवड्यार फक्त मायभाशेचेरूच भर दिवंक जाय. तिसरी भाशा शिकोवपाक नवे शिक्षक नेमचे पडटले, अशेंय थोड्यांक दिसता. हिंदी दोळ्यां मुखार नाका आशिल्ले लोक दक्षीणेंत आसात. तांकां तें सांस्कृतीक संकश्ट दिसता. लोक इंग्लीश, हिंदी मिस्तुराद करून उलयतले आनी मायभाशेची वाट लागतली, असोय तांकां भंय.
त्रिभाशा सुत्राच्या समर्थकांच्या मतान, ह्या धोरणा उपरांत भोव भाशा उलोवपी लोक तयार जातले. राष्ट्रवाद वाडटलो, एकवट घट जातलो. भुरग्यांचें व्यक्तीमत्व सुदारतलें, तांकां जिवितांत ताचो फायदोच जातलो. हिंदींत फिशाल जायत जाल्यार देशभरांत रोजगाराची चड संद मेळटली. महाराष्ट्रा उपरांत आतां हेर राज्यांकूय हें त्रिभाशा सूत्र स्विकारचें पडटलें. एप्रीलांत शाळा सुरू करपाचो निर्णय विरोध जावनूय चालीक लागला, आतां ह्या तीन भाशांच्या सुत्राचें कितें जाता, तें पळोवया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
