भांगरभूंय | प्रतिनिधी
खबरां संस्था
श्रीनगर : ऑपरेशन महादेव खाला भारतीय सैन्यान सोमारा श्रीनगराच्या लिडवास वाठारांत लिपिल्ल्या तीन पाकिस्तानी आतंकवाद्यांक जिवेशी मारले. चिनार कॉर्प्सान X चेर ही खबर दिल्या. मारिल्ल्या आतांकवाद्यां मगीं पहलगाम हल्ल्यांतलो मुख्य दुबावीत सुलेमान शाह उर्फ हाशीम मुसा लेगीत आशिल्लो. पीटीआयन दिल्ले खबरे प्रमाण मारिल्लो आतंकवादी हो हाशीम मुसाच आशिल्लो हाचें लश्कराच्या अधिकाऱ्यांनी खरेंपण तपासलां.
हेर आतंकवाद्यांची वळख पटोवपाचे यत्न चालू आसात, अशें सैन्याच्या म्हणयाऱ्यान सांगलें. हेर दोन आतंकवाद्या मदल्या एकल्याचो 2024 त सोनमर्ग बोगदा प्रकल्पाचेर केल्ल्या हल्ल्यांत वांटो आशिल्लो अशें म्हणटात.
आतंकवाद्यां कडल्यान अमेरिकन एम 4 कार्बायन, एके- 47, 17 रायफल आनी ग्रेनेड जप्त केल्यात. कांय हेर दुबावीत वस्तू लेगीत जप्त केल्यात. मंगळारा लश्करा कडल्यान ऑपरेशन महादेवची म्हायती मेळपाक शकता. लश्कराच्या म्हणण्या प्रमाण, सकाळीं 11 वरांचेर गुप्तचरा कडल्यान म्हायती मेळ्ळे उपरांत लिडवासांत सोद मोहीम सुरू केल्ली. हे मजगतीं, पयसुल्ल्यान दोन खेपे फारपेट केल्ल्याचो आवाज आयकुपाक आयलो. ह्या वाठारांत सुरक्षा दळाची तैनात वाडयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
