भांगरभूंय | प्रतिनिधी
अंबाजी- फातोड्ड्यां वेवसायीक तशेंच राबितो कॉम्प्लेक्साची घाली बुन्याद
मडगांव: हावसींग बोर्डा कडल्यान फ्लॅट वा सुवात विक्री केले उपरांत धा वर्सा तांणी तांकां विकूंक येना. उपरांत विकतात आशें जाल्यार हावसींग बोर्ड कांयच करूंक शकना. दरेकाची अर्थीक स्थिती वेगळीवेगळी आसूंक शकता. हावसींग बोर्ड वाठारांतल्या अतिक्रमणां विशीं दोन फावटी पळोवणी केल्या. पुलिसांक हाची म्हायती दिल्या. रस्त्यां वेल्या अतिक्रमणां विशीं बांदकाम खात्याक म्हायती दिल्या, आनी तांचेर कारवाय केले उपरांत परतून अतिक्रमणां येतात. तांकां नोटीसो काडल्यात अशी म्हायती हावसींग बोर्डाचे अध्यक्ष आमदार जीत आरोलकार हांणी दिली.
अंबाजी फातोड्ड्यां हावसींग बोर्डा वतीन वेवसायीक तशेंच राबितो कॉम्प्लेक्स उबारपाची बुन्याद बुधवारा घाली. ह्या वेळार हावसींग बोर्डाचे अध्यक्ष आमदार जीत आरोलकार, आमदार विजय सरदेसाय हाजीर आशिल्ले.
आमदार जीत आरोलकार हांणी सांगलें, खूबशीं वर्सा प्रलंबीत आशिल्ले प्रकल्प चालीक लागतात. अंबाजी फातोड्ड्यां हावसींग बोर्डा वतीन 120 फ्लॅट आसून तातूंत 31 फ्लॅट 3 बीएचके आनी 99 फ्लॅट 2 बीएचके आसात. तशेंच 12 वेवसायीक सुवातो आसात. हातूंत चडशा गोंयकारांक सुवात दिवपाचाे यत्न आसतलो. हातूंतल्यो 30 टक्के सुवातो फातोड्डेंकारां खातीर आरक्षीत आसतल्यो. हेर सुवात 30 वर्सां गोंयांत रावन आशिल्ल्या गोंयकारां खातीर आसात अशें आरोलकार हांणी म्हणलें.
सर्वसामान्यांक परवडपी दरांक सुवात मेळची हे खातीर हो यत्न आसा. ह्या प्रकल्पाचें बांदकाम हें बरे प्रतीचें आसतलें. उक्ते सुवातेची 3 हजार चौखण मिटर सुवात ही मडगांव पालिके कडेन हस्तांतरीत केल्या. लोकांची मागणी आसल्यार हे उक्ते सुवातेचो विकास ह्या प्रकल्पा बरोबरूच करून दितले अशेंय जीत आरोलकार हांंणी सांगलें.
ह्या वेळार आमदार विजय सरदेसाय हांणी म्हणलें. फातोड्डें मतदारसंघ हो गोंयांतलो मुळाव्यो सुविधा उपलब्ध आशिल्लो मतदारसंघ आसा. भुंयगत घाण उदकाची वाहिनी, भुंयगत वीज वाहिनी आसात. रस्ते व्हड आसात. विवीध धर्माचे लोक शांततायेन रावतात. गोंय हावसींग बोर्डान थळाव्या लोकांक विस्वासांत घेवन काम मुखार व्हरपाची गरज आसा. ह्या कॉम्प्लेक्सांत 30 टक्के थळाव्यांक फ्लॅट वा गाळे उपलब्ध करून दितले. तशेंच हांगा सुवाते खातीर 30 वर्सां रहिवाशी दाखलो आसचो अशी अट आसा. तशेंच कॉम्प्लेक्स उबारणी वेळार उक्ते सुवातेचो विकास करचो अशी मागणी केली.
गोंयांत ईडीएम उत्सवाची गरज: आरोलकार
गोंय हें पर्यटन राज्य आशिल्ल्यान ईडीएम उत्सवाची गरज आसा. पूण हो महोत्सव खंय जावचो आनी खंय जावचो न्हय हो सरकाराचो आनी थळाव्या लोकांचो प्रस्न आसा अशें मत जीत आरोलकर हांणी सनबर्न आयोजा वेल्या प्रस्नाचेर उक्तायलें. पणजेंत जावपी रापणकारांचो सी फूड महोत्सव हो ह्या वेळार 13 ते 15 ह्या काळांत मांद्रें मतदारसंघांतल्या हरमला जातलो अशेंय तांणी मुखार उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
