भांगरभूंय | प्रतिनिधी
रांची, खबरां संस्था: देशांत रेल्वे अपघात घडतूच आसात. तातूंत आतां आनीक एक अपघाताची भर पडल्या. हावडा-मुंबय मेल एक्स्प्रेस ट्रेनीचो अपघात जाला. हावडा-मुंबय मेल एक्सप्रेस (१२८१०) रुळा वयल्यान निसरली. हे रेल्वेचे सगळे डबे रुळा वयल्यान निसरून एके म्हाल गाडयेक आपटले. ह्या अपघातांत दोगांक मरण आयलें. जाल्यार जायते जाण जखमी जाल्यात. घडणुके सुवातेर वाटावपा खातीर पंगड पावला. जखमींक उपचारा खातीर लागसारच्या हॉस्पिटलांत दाखल केल्यात. जखमींचो आनी मरण आयिल्ल्यांचो आंकडो वाडपाची शक्यताय आसा.
फांतोडेर मेळ्ळी अपघाताची म्हायती
हो अपघात राजखरसवां वेस्ट आवट आनी बाराबम्बो मजगतीं जालो. हावडा-मुंबय मेल एक्सप्रेसचे (१२८१०) १८ डबे रुळा वयल्यान निसरले. फांतोडेर ३:४५ मिनिटांनी हो अपघात जालो. दक्षीण-अस्तंत रेल्वेच्या वरिश्ठ अधिकार्यांनी दिल्ले म्हायती प्रमाण, रेल्वेचे खुबशे डबे रुळावेल्यान निसरल्यात. कांय जाणांक चक्रधरपूर हांगा हालयल्यात.
चालकाक लागून वाटवलो जायत्या जाणांचो जीव
रेल्वेन दिल्ले म्हायती प्रमाण, ह्या अपघातांत आतां मेरेन २ जाणांक मरण आयिल्ल्याची म्हायती मेळटा. जाल्यार १५० परस चड प्रवासी जखमी जाल्ल्याचें मुखार आयलां. हे विशींची फुडली म्हायती रोखडीच कळटली. मात चालकान प्रसंग लक्षांत घेवन दाखयल्ले सादुरकायेक लागून जायत्या जाणांचो जीव वाटवल्ल्याची म्हायती रेल्वेन दिली. ह्या अपघाता विशीं जाणविकाय जातांच चालकान रेल्वेचो वेग उणो केलो. ताका लागून व्हड अपघात जावपा पसून वाटवलो. ना जाल्यार मरण आयिल्ल्यांचो आंकडो चड आसपाचो. चक्रधरपूर रेल्वे मंडळांत हे विशींचो अलर्ट मेळिल्ल्यान बरोच बोवाळ जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
