भांगरभूंय | प्रतिनिधी
मडगांव : जे मेरेन हावझी खेळांतलीं इनामां ल्हान आसलीं ते मेरेन तें बरें आशिल्लें. पूण आतां इनामाचें पयशे वाडत गेल्ल्यान हावजी खेळाचेर कायद्यान बंदी घाल्या. कायदो सर्वश्रेश्ठ अशें सांगून ही बंदी लागू उरतली अशें मुख्यमंत्री डॉ. प्रमोद सावंत हांणी स्पश्ट केले.
दक्षीण गोंयच्याे जिल्होधिकारी एग्ना क्लेटस हांणी दक्षीण गोंयांत जावपी हावझी खेळांचेर बंदी घालपाचे आदेश जारी केल्यात. ते प्रमाण उपजिल्होधिकाऱ्यांक आनी पुलिसांकय हावझी खेळ खंय खेळटात थंय ताका परवानगी दिवची न्हय वा ताचेर कारवाय करची अशी सुचोवणी दिल्या.
ते उपरांत गोंय फुटबॉल असोसिएशनाचे अध्यक्ष कायतान हांणी मुख्यमंत्र्यांची भेट घेवन हावझीचेर बंदी घातिल्ल्यान गांवगिऱ्या वाठारांतल्या फुटबॉलाचें लुकसाण जावपाक लागला. म्हणून बंदी काडून उडोवपाची विनवणी केली. हाचे भायर दक्षीण गोंयच्या कांय वाठारांतल्या हावझी आयोजकांनी बसका घेवन वेगवेगळ्या पक्षांच्या राजकी फुडाऱ्यांक मेळून हावझीचेर आशिल्ली बंदी काडून उडोवपा संबंदीं निवेदन सादर करपाचें थारायलां.
हे फाटभुंयेर मुख्यमंत्री डॉ. प्रमोद सावंत हांकां विचारलें तेन्ना ताणी म्हणलें, कायदो सगळ्यांत सर्वश्रेेश्ठ आसा. देखून कायद्या प्रमाण कारवाय केल्या. हावझी खेळाक ल्हान ल्हान इनामां आसतना तें बरोबर आशिल्लें. पूण आतां व्हडलें रूप घेवन इनामाचें पयशे वाडिल्ल्यान कायदेशीर कारवाय सुरू आसा अशी म्हायती मेळ्ळी. ताका लागून सरकारान हावझी खेळाचेर घातिल्ली बंदी काडून उडोवची अशी मागणी करपी लोकांची मुख्यमंत्र्याच्या निवेदनान निरशेवणी जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
