भांगरभूंय | प्रतिनिधी
संवसारभर ८ मार्च हो आंतरराश्ट्रीय बायलांचो दीस म्हणून मनयतात. ह्या दिसा बायलांचे भलायके संबंदीं जायत्यो जागृताय कार्यावळीय चलतात. बायलांची भलायकी घटमूट आसप सगळ्यांत म्हत्वाचें. पिराये प्रमाण बायलांच्या आंगांतल्या हार्मोनांत खूब बदल जातात. कुडीच्या विवीध कार्यांत हार्मोनांची म्हत्वाची भुमिका आसता, पूण जेन्ना कुडींत हार्मोनांचें असंतुलन जाता तेन्ना जायते प्रस्न उप्रासतात. सेगीत आनी बरोच काळ हार्मोनलाचें असंतुलन बायलांक चिंतेचें थारूंक शकता. कुडींतल्या हार्मोनल असंतुलनाचीं लक्षणां खंयचीं हें जाणून घेयात:
हार्मोनल बॅलन्स इबाडल्यार दिसपी बदल
मासीक पाळयेचो नेम चुकप: जर तुमकां बर्याच दिसा सावन म्हयन्याचे पाळयेंत बदल दिसतात, जशे मासीक पाळी वेळा आदीं वा उसरां येवप.हें हार्मोनल बदलांचें लक्षण आसूं येता. ताका पॉलीसिस्टीक ओव्हररी सिंड्रोम (पीसीओएस) वा थायरॉयड सारकिल्ल्या समस्यांची तपासणी करची.
वजन वाडप – जिणेंत व्हडलोसो बदल जालो ना, पूण वेगान वजन वाडप वा उणें जावप हो हार्मोनल असंतुलनाचो संकेत आसूं येता. हार्मोनल भलायके खातीर वजनांत बदल करपाचेर लक्ष दिवचें. थायरॉयडाची वा इन्सुलिनाक प्रतिकार करप सारकिल्ल्यो हार्मोनल समस्या आसात काय ना तें तपासचें.
कांती संबंदी समस्या- हार्मोनांत बदल जावपाचीं लक्षणां कातीचेरूय दिसूंक लागतात. पुळयो, कांत तेलकट वा चड सुकी जावप हींय हार्मोनल असंतुलनाचीं लक्षणां आसूं येतात. अशे तरेचे त्रास जातात जाल्यार दोतोराचो सल्लो घेवचो.
मूड स्विंग- हार्मोनल असंतुलनाक लागून मूड स्विंग, चिडचिडेंपण, चिंता वा डिप्रेशनूय लेगीत जावपाक शकता. मूड डायरी दवरात आनी मुळाव्या कारणा जाणून घेवपाक नमुन्यांची नोंद करात. चड समस्या आसल्यार उपचारा खातीर दोतोराचो सल्लो घेवचो.
थकिल्ले वरीं दिसप आनी न्हीद पडना: थकिल्ले सारकें दिसप, उणी उर्जा आनी लक्ष केंद्रीत करपाक कठीण जावप हींय हार्मोनल असंतुलनाचीं लक्षणां आसूं येतात. तुमचे जिणे पद्दतीचेर लक्ष दिवचें, जशें न्हिदेच्या पद्दतीचेर आनी ताण कित्याक लागून जाता तें सोदून काडपाचो यत्न करचो. चड समस्या आसल्यार तुमच्या दोतोराचो सल्लो घेवचो.
केंस वचप- केंस गळप, पातळ जावप, केंसांच्या पोतळेंत बदल जावप हेय त्रास जावंक शकतात. हाचें एक कारण म्हळ्यार हार्मोनांतले बदल आसूं येतात. हे खातीर निरोगी आहार घेवचो आनी ताणांतल्यान पयस रावचें. त्रास आनीक वाडत जाल्यार दोतोरा कडेन वचचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
