भांगरभूंय | प्रतिनिधी
वॅस्ट इंडिजाचे भोंवडेर 3 ऑगस्टा सावन सुरू जावपी पांच टी-20 मॅचींचे माळे खातीर भारताच्या पंगडाची घोशणा केली. अश्टतासांचो खेळगडो हार्दीक पांड्याक मुखेली केला. सुर्यकुमार यादवाक उप मुखेलीपद दिलां. विराट कोहली, रोहित शर्मा आनी रवींद्र जडेजा ह्या वरिश्ट खेळगड्यांक विसव दिला.
आयपीएलांत मुंबय इंडियन्सा वतीन खेळपी 20 वर्सां पिरायेच्या तिलक वर्माक वयले खेपे संद मेळ्ळ्या. जाल्यार कोलकाता नायटरायडर्सा वतीन खेळपी रिंकू सिंगाक मात संद मेळूंक ना. ताणें आपल्या प्रदर्शनाचेर कोलकाताक साबार मॅचींनी जिखून दिवपाक मोलादीक योगदान दिल्लें.
केरळाचो विकेटकीपर बॅट्समन संजू सॅमसनान परतून एकदां पंगडांत सुवात मेळयल्या. संजून आपली निमाणी मॅच जानेवारींत श्रीलंका पंगडा आड खेळिल्लो. ते उपरांत तो जखमी जाल्लो.
मजगतीं, तिलक वर्मा, यशस्वी जयस्वाल आनी बिहाराचो फास्ट बॉलर मुकेश कुमार हांची पंगडांत निवड केल्या. ह्या तिनूय खेळगड्यां कडेन आंतरराष्ट्रीय मॅचींत पदार्पणाची संद आसा.
3 ऑगस्टाक त्रिनिदादांत पयली टी-20 मॅच जातली. गुयानांत 6 आनी 8 ऑगस्टाक दुसरी आनी तिसरी मॅच जातली. अमेरिकेच्या लॉडरहिलांत 12 आनी 13 ऑगस्टाक चवथी आनी पांचवी मॅच जातली. सगल्यो मॅची रातच्या आठ वरांचेर सुरू जातल्यो.
2022त लेगीत भारत आनी वॅस्ट इंडिज हांचे मदीं पांच मॅचींची माळ जाल्ली. त्या वेळार भारतान चार मॅची जिखिल्ल्यो.
पंगड असोः हार्दीक पांड्या (मुखेली), सुर्यकुमार यादव (उप मुखेली), ईशान किशन (विकेटकीपर), शुभमन गिल, यशस्वी जयस्वाल, तिलक वर्मा, संजू सॅमसन (विकेटकीपर), अक्षर पटेल, युजवेंद्र चहल, कुलदीप यादव, रवी बिश्नोई, अर्शदीप सिंग, उमरान मलिक, आवेश खान आनी मुकेश कुमार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
