भांगरभूंय | प्रतिनिधी
उगडास दवरात ‘गोल्डन’ नेम
लेन बदलतना पयलीं हारश्यांत मुजरत पळयात. इंडिकेटर मारचे पयलीं केन्नाच लेन बदलू नाकात. फकत ओव्हरटेक केले उपरांतूच फास्ट लेनींतल्यान भायर सरात. गती मर्यादेक पाळो दियात. सदांच मिडल लेनीक प्राधान्य दियात.
अामी दर दिसा रस्त्यांचेर गाडयो धांवतना पळयतात. एकादो धोफरायत वता जाल्यार कोण कोण सावकास सामके कासवाचे गतीन वतात. कांय लोक विचार करतात, जंय हायवेचेर जंय सुवात मेळटली तेन्ना गाडी गतीन चलोवप योग्य आसा. पूण खरी गजाल मात हाच्या सामकी उरफाटी आसा. चुकीचे लेनींत गतीन गाडी चलोवप फकत येरादारी नेम मोडप इतलेंच जायना जाल्यार व्हड व्हड दुर्घटणेचें कारण लेगीत थारता. हायवेचेर दर लेनीची आपापली जापसालदारकी आसता. एकादी लेन गतीन गाडी चलोवपा खातीर आसता, एकादी बेलंस स्पिडी खातीर जाल्यार एकादी सावकासायेन गाडी चलोवपा खातीर आसता. जर गाडी चलोवपी योग्य लेनीचो वापर करीत जाल्यार फकत येरादारी सुरळीत चलना जाल्यार सुरक्षा लेगीत कितलेशेच पटींनी वाडटा.
हायवेची लेन सिस्टम
उजवे वटेंतली लेन : ओव्हरटेक करप्यांची लेन (फास्ट लेन)
हायवेचेर उजवे वटेन आशिल्ले लेनीक ओव्हरटेक लेन म्हणटात. हे लेनींत फकत त्योच गाडयो चलपाक जाय, ज्यो हेर गाडयां परस गतीन आसतात. हाचो अर्थ असो न्हय, एकाद्यान सेगीत हेच लेनींत गाडी चलोवप. नेम स्पश्ट आसा- ओव्हरटेक करात आनी परतून मदले लेनींत परतून येयात. खूब वेळ मेरेन फास्ट लेनींत गाडी चलोवप लेगीत चुकीचें आसा आनी घातक लेगीत. गतीन वचपी गाडयांक एकसारके आडावन दवरिल्ल्यान अपघाताची शक्यताय वाडटा.
मिडल लेन : सगळ्यांत संतुलीत आनी सुरक्षीत लेन
जर तुमकां जाणा जावपाक जाय, हायवेचेर सगळ्यांत संतुलीत लेन खंयची जाल्यार जाप आसा मिडल लेन. ताका बेलंस लेन लेगीत म्हणटात. कारण थंय गती चड आसना आनी खूब उणीय आसना. खूब अंतराचो प्रवास करचे खातीर ही लेन सगळ्यांत चड सुसेग दिवपी आनी सुरक्षीत मानतात. चडश्यो मोटारी हेच लेनींत चलतात, ताका लागून येरादारी सुरळीत जाता आनी ओव्हरटेक करप लेगीत सोंपें जाता.
दावी लेन : स्लो स्पीड आनी व्हड गाडयां खातीर
ही लेन त्या गाडयां खातीर आसा, ज्यो उणे गतीन चलतात. देखीक ट्रक, अवजड गाडयो, लोडेड ट्रान्सपोर्ट आनी सावकासायेन चलपी मोटारी. हे लेनींतल्यान थेट फास्ट लेनींत वचप सगळ्यांत घातक ड्रायव्हिंगांतले चुकींतली एक. गतीन वचपी गाडयो फास्न लेनींत पयलींच धांवत आसतात. हाका लागून गाडयेचो अपघात जावपाची शक्यताय खूब वाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
