भांगरभूंय | प्रतिनिधी
पणजे पयल्या हायटेक वॅक्यूम सीवरेज यंत्रणेचें उक्तावण
पणजी, प्रतिनिधी : सखल आनी सुकतीच्या वाठारांत घाणयारें उदक जमनींत झिरपुपाची भिरांत आसता. हायटेक वॅक्युम सीवरेज यंत्रणेक लागून लोकांचे सुविधे सयत पर्यावरणाची लेगीत जतनाय जातली, अशें मुख्यमंत्री डॉ. प्रमोद सावंत हांणी सांगलें.
पणजे राज्यांतल्या पयल्या हायटेक वॅक्युम सीवरेज यंत्रणेचें आयज उक्तावण जालें. त्या वेळार ते उलयताले. अमृत येवजणे खाला जाल्ले हे हायटेक सीवरेज यंत्रणेचेर ८.५२ कोटी रूपया खर्च जाल्यात.
मळा, सांत इनेज सारकिल्ल्या सखल वाठारांत घाणयारें उदक पायपांतल्यान जमनींत झिरपता. हाका लागून सांतिनेज खारजा सयत मांडवी न्हंयेचें उदक दुशीत जावपाचो धोको आसता. हायटेक वॅक्युम सीवरेज यंत्रणेक लागून घाणयारें उदक पायपांतल्यान सीवरेज प्रकल्पांत वता. पर्यावरणाची जतनाय करपाक हीं यंत्रणा पूरक थारता, अशें डॉ. सावंत हांणी सांगलें.
गोंयची राजधानी आशिल्लें पणजे शार हें इतिहासीक, सांस्कृतीक आनी पर्यटना खातीर संवसारांत फामाद आसा. पणजे सगळीं सरकारी कार्यालयां आसात. पणजेच्या घाणयार्या उदकाचें वेवस्थापन हें एक आव्हान आसा. हायटेक वॅक्युम सीवरेज यंत्रणां घाणयार्या उदकाची समस्या सुटावी करपाक मजत थारतलीं, अशी आस्त मुख्यमंत्र्यांनी उक्तायली.
भलायकी आनी नितळसाणी खातीर सरकार पणजे मुळाव्या सुविधांचो दर्जो वाडोपाचे सेगीत यत्न करीत आसा. हातुंतल्यान पणजेच्या लोकांची जीण सुरक्षीत जावपा सयत पर्यावरणाची राखण जातली, अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
