भांगरभूंय | प्रतिनिधी
डॉ. सावंतः पयल्या हायटेक व्हॅक्यूम सिवरेज यंत्रणेचें उक्तावण
भांगरभूंय | प्रतिनिधी
पणजीः सखल आनी सुकतीच्या वाठारांत घाणयारें उदक जमनींत झिरपुपाची भिरांत आसता. हायटेक व्हॅक्यूम सिवरेज यंत्रणेक लागून लोकांचे सुविधे सयत पर्यावरणाचो लेगीत सांबाळ जातलो, अशें मुख्यमंत्री डॉ. प्रमोद सावंत हांणी सांगलें.
पणजे गोंयांतल्या पयल्या हायटेक व्हॅक्यूम सिवरेज यंत्रणेचें मंगळारा 15 ऑक्टोबराक उक्तावण जालें. ह्या वेळार ते उलयताले.
अमृत येवजणे खाला जाल्ले हे हायटेक सिवरेज यंत्रणेचेर 8.52 कोटी रुपया खर्च जाल्यात.
मळा, सांतइनेज सारकिल्ल्या सखल वाठारांत घाणयारें उदक पायपांतल्यान जमनींत झिरपता. हाका लागून सांतिनेज व्हाळा सयत मांडवी न्हंयेचें उदक दुशीत जावपाचो धोको आसता. हायटेक व्हॅक्यूम सिवरेज यंत्रणेक लागून घाणयारें उदक पायपांतल्यान सिवरेज प्रकल्पांत वता. पर्यावरणाची जतनाय करपाक ही यंत्रणा पूरक थारता, अशें डॉ. सावंत हांणी सांगलें.
गोंयची राजधानी आशिल्लें पणजे शार हें इतिहासीक, सांस्कृतीक आनी पर्यटना खातीर संवसारांत फामाद आसा. पणजे सगळीं सरकारी कार्यालयां आसात. पणजेच्या घाणयार्या उदकाचें वेवस्थापन हें एक आव्हान आसा. हायटेक व्हॅक्यूम सिवरेज यंत्रणां घाणयार्या उदकाची समस्या सुटावी करपाक मजत थारतलीं, अशी आस्त मुख्यमंत्र्यांनी उक्तायली. भलायकी आनी नितळसाणी खातीर सरकार पणजे मुळाव्या सुविधांचो दर्जो वाडोपाचे सेगीत यत्न करीत आसा. हातूंतल्यान पणजेच्या लोकांची जीण सुरक्षीत जावपा सयत पर्यावरणाची राखण जातली, अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
