भांगरभूंय | प्रतिनिधी
एका म्हयन्या फाटीं, नातालाच्या दिसांनी पणजे ते पर्वरेचे खाजगी बशींतल्यान प्रवास करपी एके विद्यार्थिनीक कंडक्टरान सुटयेच्या दिसांनी ‘हाफ तिकेट’ ना म्हूण सांगून ताका रडोवपाचो यत्न केलो. तें बाबडें ओगीच रावलें. मात मोटवें काल्सांव घाल्लो कंडक्टर फरफरत आशिल्लो. बडबडत आशिल्लो. हाफ तिकेट म्हणल्यार ताका तिडक मारता हें जाणवतालें. वयल्यान तें चली बसून वतालें. कंडक्टराचें फूल तिकेटीचें एक सीट काबीज जाल्लें. ताणें ते चलयेचो अपमान करून लेगीत, तें स्वताय ताचे कडेन झुजपाक शकलें ना आनी कानांत ‘इयर बड्स’ घाल्ले प्रवाशीय ताचे मजतीक आयले नात. खाजगी बशींत हड्डें फुटून वचपा इतल्या मोठ्यान स्टिरियो लायतात, तातूंत लोक फोनाचेर मोठ्यान मोठ्यान उलयतात आनी त्या बोवाळांत ह्या चलयेचें मौन कोणाक आयकूंक येतलें?
कांय वर्सां आदीं आरटीओ तरी वाटेर रावून अश्या कंडक्टरांक उतरांचो मार दिताले. उबे रावपाक परवानगी आसता, ताचे भायर प्रवाशांक चेपणाक घालून व्हेल्यार विचारताले. तालांव दिताले. आतां हें दृश्य दिश्टी पडना. ताचीं वेगळींवेगळीं कारणां आसूं येतात. खाजगी बशींच्या संघटणांचो दबाव, राजकारण्यांचो दबाव वा आरटीओ ‘आनीक खंय तरी’ व्यस्त आसपाक शकतात. पूण हाचो परिणाम विद्यार्थी वर्ग आनी हेर प्रवाशांचेर जाता हें सामकें खरें. सरकाराची ‘म्हजी बस’ येवजण चालीक लागूनय हें अशें घडटां तें दुर्दैव.
बऱ्याच वर्सां आदीं पणजे ते मिरामारचे खाजगी बशींतल्या एका कंडक्टरान ‘हाफ तिकेटी’ वयल्यान एके विद्यार्थिनीक त्रास दिवपाक सुरवात केल्ल्याची घडणूक घडिल्ली. हांवूय तेच बशींत आशिल्लों. ती विद्यार्थिनी मिरामार वचपाची आनी हांव मार्केटा कडेन देंवपाचो. केटीसी बस स्थानका कडेन बस सुटचे आदींच ह्या कंडक्टरान ते चलये कडेन कासकिसांवां करपाक सुरवात केली. ताच्या भुजाक हात लावन ताका फाटीं चल, फाटीं चल करून धुकलपाक लागलो. म्हज्यान तें पळोवंक जालें ना आनी हांवें ताका ते विचारतकच ताणें म्हाकाच धुकलून कॅबिनांत उडयलो. हांवें ते बशींतल्यान देंवून पुलिसांक फोन करून आपयले.
पुलीस पावता म्हणल्यार बस सुटली आनी मिरामार पावली. पुलिसांनी म्हाका पुलीस स्टेशनार सोडून ते बशीच्या कंडक्टराक सोदून हाडपाक गेले. हांव पुलीस स्टेशनार आसतना हातांत 10 -15 पवनांची भांगराची मास्कद घाल्लो बशीचो पात्रांव येवन म्हाका माणेवन पळोवपाक लागलो आनी कागाळ करपी हांवूच म्हूण कळटकच तेन्नाच्या पुलीस निरिक्षका मुखारच म्हाका धमकी दिवपाक लागलो.
‘‘हांव पात्रांवालो (तेन्नाचे घर मंत्री रवी नायक) मनीस. तुजी ही कागाळ हांव आतांच्या आतां भायर उडयता पळय. कोण रें तूं, म्हाज्या कंडक्टराचेर कम्प्लेन करपी!! तुजे असले आमकां सदांच सांपडटात. न्हू रे सायबा,’’ अशें म्हणत घडये पात्रांवाच्या आशिर्वादान पुलीस निरिक्षकाच्या कदेलार बशिल्ल्या त्या खाकींतल्या व्यक्तीक पळयत बशीचो पात्रांव म्हाका धमकी दीत रावलो. त्या पुलीस निरिक्षकान एका उतरान ताका कांयच म्हणलें ना.
पुलीस कायद्याक धरून लोकांचें रक्षण करपाक आसतात, पूण ताचे मुखारूच एक गुंड प्रवृत्तीचो बस धनी एका सामान्य व्यक्तीक धमकी दिता तें पळोवन ताच्यातलो पुलीस बी जागो जालो ना. इतल्यान नाकांतल्यान रगत देंवत आनी पोले तांबडे जाल्लो कंडक्टर पुलिसां वांगडा भितर सरलो. ताचें रगत पळोवन बशीच्या पात्रांवाचें रगत सामकेंच सळसळ्ळें.
‘‘आतां तर हांव तुका सोडचोच ना,’’ म्हाका परत बस धनयाची धमकी. कंडक्टर धांवता धांवता पडलो आनी नाक आपटलें, काय पुलिसांचे गाडयेंत बशिल्लो तेन्ना ताच्या नाकाक दार आपटल्लें, तें म्हाकाय खबर ना. काय कंट्रोल रुमांतल्या पुलीस उपअधिक्षकान म्हजी वळख त्या जिपींतल्या पुलिसांक सांगिल्ली तेंवूय कळपाक म्हाका मार्ग नाशिल्लो. म्हजो मार्ग एकूच आशिल्लो. जे चलयेक ते बशींत अपमान सोंसचो पडलो, ताका न्याय दिवपाचो आनी कंडक्टरांची दादागिरी बंद करपाची. पूण म्हाका भिवोवपाक थंय हेर कंडक्टरांची फौज आयली आनी ताचो वकीलय आयलो.
कितलोसोच वेळ त्या बशीच्या धनयाच्यो धमकी आयकून मौन धारण केल्लो पुलीस निरिक्षक फोन येतकच अचकीत जागो जालो आनी ताणें त्या कंडक्टराक भितर उडोवपाचो आदेश दिलो. तें पळयतकच भांगराची मास्कद घालून आयिल्लो बस धनी पगळ्ळो आनी पुलीस निरिक्षकान ताच्या कानांत कितें तरी सांगतकच, दोनूय हात जोडून म्हाका पांयां पडलो आनी चूक जाली म्हणून, म्हज्या फाटल्यान फुडल्यान भोंवपाक लागलो. हांवें ताका इतल्यान सोडलो ना. दुसरे दिसा आरटीओ संचालका कडेन ताची कागाळ करून केस लडयली आनी त्या कंडक्टराक 6 म्हयन्या खातीर पणजेच्यान ‘तडीपार’ केलो. म्हणल्यार स म्हयने ताका पणजेच्या खंयचेच बशीचेर कंडक्टर म्हूण चडपाची मेकळीक नाशिल्ली.
ही इतली काणी सांगपाचें कारण इतलेंच की आमी समाजाच्या न्याया खातीर झुजल्यार आमकां कोण तरी पावतलो. नाजाल्यार अन्यायाचे दोंगर व्हड व्हड जातले आनी अन्याय करपी राकेस ह्या संवसाराचेर राज करतले. तांकां जल दिवन उपकारचें ना. तो मागीर पुलीस अधिकारी आसूं, कंडक्टर आसूं वा केदेय व्हडलो पावरफूल व्यक्ती.
हाफ तिकेटी खातीर 1980 त ची विद्यार्थी चळवळ जाल्ली. ते चळवळीन अशा दोगा पावरफूल मंत्र्यांक राजिनामो दिवपाची पाळी हाडिल्ली. ते चळवळीचे शक्तीन आयज विद्यार्थ्यांक हाफ तिकेटीची सुविधा मेळटा. हो इतिहास आमच्या तरणाट्यांनी जाणां जावन घेवपाची गरज आसा. फक्त ‘इयर बडस्’ घालून मोबायलाचेर गेमी खेळत रावले आनी रिल्स पळयत रावले जाल्यार ताचो कसलोच फायदो आपल्या जिवितांत जावचो ना, हें लेगीत मतींत धरचें.
कांय वर्सां आदीं एका राजकारण्याच्या विद्यार्थी पुतान फोंड्यां विद्यार्थ्यांच्या न्याया खातीर आवाज केल्लो. बसी आडायिल्ल्यो. तो ‘तमाशा’ एकूच दिसा खातीर आशिल्लो. राजकी पक्षांच्योय अश्यो विद्यार्थी संघटणां आसतात. त्यो लेगीत वयल्यान ऑर्डर येता तेन्नाच कार्यरत जातात. ते खातीर विद्यार्थ्यांनी कोणाचेर निंबून रावनासतना स्वताच्या न्याया खातीर पावल मारचें. दुसऱ्याचो अपमान जाता तो पळोवन मौन धारण करचें न्हय.
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
