भांगरभूंय | प्रतिनिधी
सरकारन नेमली देखरेख समिती
पणजी : भंगी कामगार म्हूण रोजगार प्रतिबंद आनी तांचे पुर्नवसन कायदो २०१३ खाला खंयचीय व्यक्ती, थळावी यंत्रणां वा खंयचीय एजन्सी प्रत्यक्ष वा अप्रत्यक्षपणान खंयच्याय व्यक्तीक सिव्हरेज गटार वा सेप्टिक टांकयेचीं नितळसाण करपाचीं कामां करपा खातीर नियुक्त करपाक बंदी आसा, अशें समाज कल्याणा खात्यान कळयलां.
ह्या कायद्याचे अंमलबाजावणी खातीर कायद्यांतल्या तजवीजे प्रमाण राज्यांत राज्य देखरेख समिती, दक्षता समिती, जिल्हा पांवड्यार सर्वेक्षण समिती, राज्य पांवड्यार सर्वेक्षण समिती स्थापन केल्या.
हातांनी हळशीक साफ करपाक कामगार म्हूण काम करपाक लावप कायद्यान बंदी आसून खंयच्याय व्यक्तीक हातांनी हळशीक साफ करपाक, गटार आनी सेप्टिक टांक्यांची धोक्याच्या पद्दतीन नितळसाण करपाक कामगार म्हूण कामाक लावप्यांचेर कायद्या खाला कारवाय जातली. कायद्याचे कलम ७चे नेम मोडटल्याक पयल्या उल्लंघना खातीर दोन वर्सां मेरेन बंदखण वा दोन लाख रुपयां दंड वा दोनीय शिक्षा जावपाक शकता आनी त्या फुडल्या खंयच्याय उल्लंघना खातीर पाच वर्सां मेरेन बंदखण वा पाच लाख रुपयां दंड वा दोनीय शिक्षा जावपाक शकता.
ह्या कायद्या खाला शिक्षापात्र आशिल्ल्या गुन्यांवाची दखल खंयचेंय न्यायालय घेवचें ना, जो मेरेन गुन्यांव घडिल्ले तारखे सावन तीन महिन्यांच्या काळाभितर ते विशीं एखाद्या मनशान कागाळ केली ना जाल्यार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
