भांगरभूंय | प्रतिनिधी
महाराष्ट्र नवनिर्माण सेनेचे मुखेली राज ठाकरे हांचीं भाशणां आयकुपाक खास प्रेक्षक येतात. गर्दी जाता, पूण तिचें रुपांतर मतदानांत जायना. आतां मेरेन तांच्या पक्षाक व्हडलेशें यश मेळूंक ना. हे खेपे ते युती करतले अशें जाणकारांक दिशिल्लें. मात, घडये मना सारके जागे मेळूंक नात म्हूण तांणी स्वतंत्रपणान विधानसभेची वेंचणूक लढोवपाचें थारायलां आसतलें. सध्या महाराष्ट्रांत प्रचाराक नेट आयला आनी यवतमाळचे सभेंत ठाकरे हांणी एक उलोवप केलां, तें चर्चेचो विशय थारलां. ‘फाल्यां म्हजें (?) सरकार सत्तेर येतकच लाडकी बहीण सारक्यो कसल्योच फुकट गजाली मेळच्यो नात. बायलांक, चलयांक काम मेळटलें आनी तांकां सक्षम करपाचें काम हांव करतलों. राज्यांतलो दरेक मनीस सक्षम करपाक जाय. पूण, आमचो सगलेच वटेन सत्यानाश जायत आसा.’ अशें तांणी म्हणलां. दरेका राजकी पक्षान, जाणकारांनी आनी समाजानूय हाचेर विचार करपाचो वेळ आतां आयला.
फुकट्यो येवजण्यो, अनुदानां, सवलतींचो आमच्या देशांत शिंवर जायत आसा, ताका पन्नास वर्सां जातलीं. घडये चडूच. स्वातंत्र्य मेळ्ळें तेन्ना ती गरज आशिल्ली. कारण गरिबांक वयर काडपाचे आशिल्ले. शेतकार, वेवसायिकांक, धंदेकारांक हात दिवपाचो आशिल्लो. भुरग्यांक शिक्षणा कडेन आकर्शीत करपाचें आशिल्लें. लोकांक कामांक लावपाचें आशिल्लें. मात, उपरांतच्या काळांत फक्त मतां खातीर लोकांक आपले वटेन ओडून घेवपाक तरातरांच्यो कल्पक येवजण्यो राजकी पक्षांनी तयार केल्यो आनी तातूंतल्यो कांय सत्तेर येतकच कांय काळ चालीक लायल्यो. अर्थांत सगल्योच दीर्घ काळ तिगल्यो नात. निधी ना, मनीसबळ ना, दुकळ पडला, दुसरे कडेन पयसो घालपाक जाय… अशीं साबार कारणां मुखार करून मुफत येवजण्यां वरवीं लोकांक मेळपी पयसो बंद केलो. कांय आकर्शक घोशणा तर अस्तित्वांतूच येवंक नात. तो एक जुमला आशिल्लो, अशें मागीर जाहीर जालें. मजा म्हणल्यार सुशिक्षीत, विचारी लोक पसून ह्या घोशणांचे, चालीक लायिल्ल्या येवजण्यांचे आशेन विचार करिनासतना राजकी पक्षां फाटल्यान ओडत गेले. हालींच्या वर्सांनी तर कोणाची येवजण (फुकटांत मेळपी पयशे) बरी हाचेर विचार करून मतदार मतां दितात खंय!
मुफत येवजण्यो दिवपाची तशी आमच्या देशांत गरज आसा. कारण कांय लोक अजून दळडीर रेशे सकयली जीण जगतात. तांकां दोन वेळाचें जेवण मेळना. कुटुंबाक अर्थीक मजत करपाक भुरग्यांक ल्हान पिरायेचेर शाळा सोडून मेळटा तें काम करचें पडटा. गरिबी वाडल्या. म्हारगाय मळबाक तेंकल्या. म्हणटकच समाजाच्या कांय घटकांक फुकट्यो गजाली मेळप ही तांची गरज जाल्या. पोरूं प्रधानमंत्री नरेंद्र मोदी हांणी रेवड्यो वांटपाचे प्रकार हालीं खूबच वाडल्यात, अशी खंत उक्तायिल्ली. एका विशिश्ट पक्षाक तांणी मारिल्लो तो थोमणो आशिल्लो. पूण, उपरांतच्या काळांत आयिल्ल्या वेंचणुकांनी सगल्याच पक्षांनी एक से बढकर एक रेवड्यो दाखोवपाक, विकपाक सुरवात केली. मतदारांकूय त्यो खूब- खूब रुचीक लागल्यो. आयज एक पसून पक्ष रेवडी जाहीर करिनासतना वा वांटिनासतना उरूंक ना. उरल्यात अजून सत्तेर येवंक नात, तेच पक्ष! आमी सवलत दिवन पसून म्हापालिका फायद्यांत हाडली, अशें एका पक्षान फाटीं जाहीर केल्लें. हें घडिल्ले, कारण भ्रश्टाचाराक लागून गडप जावपी निधी वाटावन तो पयसो तांणी लोकांक मुफत येवजण्यो दिवपाक वापरिल्लो. पूण हें सदांच आनी सगले कडेन येसस्वी जाताच अशें ना. अंदुंचे वेंचणुके वेळार महाराष्ट्र मंत्रीमंडळान घेतिल्ले निर्णय, जाहीर केल्ल्यो येवजण्यो हांचो आंकडो हजारां वयर गेला. तोय फक्त 10 दिसांनी. मागीर वेंचणूक आयोगान मदीं पडून भितरले कांय निर्णय स्थगीत दवरपाक लायले. कांय पक्ष मतदारांक मोनेळ घालपाक, तांची दिशाभूल करपाक मुफत येवजण्यांची घोशणा करतात, मात मतदान जातकच तांकां तांची याद उरतातूच अशें ना. मतदारूय पांच वर्सां कांय करपाक शकनात.
तरणाट्यांक, बायलांक मुफत कितेंय दिवपा परस, तांच्या हातांत काम दिवपाक जाय. गोंया सारक्या राज्यांत तर उंचेलें राहणीमान, म्हारगाय मतींत घेवन दरेकल्याक म्हयन्याक उणेच 25 ते 30 हजार मेळटले, असो वेवसाय, नोकरी जाय. दरेकलो स्वावलंबी, अर्थीक नदरेन सक्षम जालो जाल्यार ताका मुफत रेवडेची गरजूच पडची ना. पूण, मागीर तो विचार करून मतदान करपाक लागलो जाल्यार?? ही भिरांत राजकी पक्षांक सतायता आसतली. देखूनच ते रेवडेचेर रेवडी, कापां, खाजें, लाडू मतदारांक वांटिनात मूं?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
