भांगरभूंय | प्रतिनिधी
नागपंचमीचे फाटभुंयेर जनजागृती मोहीम
भांगरभूंय । प्रतिनिधी
दिवचल : नागपंचमीटे फाटभुंयेर सोरपां विशीं जनजागृती करचे खातीर ‘आय ब्रेक फॉर स्नेक’ (हांव सोरपा खातीर ब्रेक मारता) ह्या विशेश उपक्रमाचें आयोजन सोमारा गोंय रान खातें आनी सरकारी मुळावें विद्यालय, पुनर्वसन- साळ, दिवचल हांच्या जोडपालवान केल्लें. ह्या उपक्रमा वरवीं सैम संवर्धनाचो प्रभावी संदेश दिलो.
ह्या उपक्रमाचा मुख्य उद्देश रस्त्यांचेर येवपी सोरपांचो जीव वाटावप आनी वाहन चालकांक सोरपांच्या संवर्धनाचें म्हत्व पटोवन दिवप हो आशिल्लो. सोरोप हो पर्यावरणांतल्या अन्नसांखळींतलो खुबूच म्हत्वाचो घटक. तांचें संरक्षण सैमाचो समतोल राखपा खातीर गरजेचें आसा, हो संदेश ह्या उपक्रमांतल्यान दिलो.
उपक्रमा मजगतीं विद्यार्थ्यांनी ‘म्हाका आनी म्हज्या सांगात्यांक गाडये पोंदां चिड्डूं नाकात’ असो काळजाक हात घालपी संदेश घेवन गोंय दोडामार्गा वयल्या आदल्या तपासणी नाक्या कडेन उबे रावून वाहन चालकांचें लक्ष ओडलें. यत्ता दुसरेच्या विद्यार्थ्यांनी हातांत ‘आय ब्रेक फॉर स्नेक’ अशे तकटे घेवन रस्त्याचेर उबे रावून प्रत्यक्ष कृती वरवीं सोरपांच्या संवर्धनाचो संदेश दिलो.
कार्यावळींत रान खात्याचे प्राणी संवर्धक विराज परवार हांणी ‘नागपंचम – परंपरे सावन संवर्धना मेरेन’ हे संकल्पनेचेर भाश्य करतना सोरपां विशींचे समज-गैरसमज पयस करपाचेर भर दिलो. ह्या उपक्रमा खातीर सोरोप तज्ञ निर्मल कुलकर्णी हांचें मार्गदर्शन मेळ्ळें. तशेंच हेरपॅक्टिव्ह, विवेकानंद पर्यावरण जागृती फौजेचे प्रतिनिधी संतोषी नायक आनी वनश्री प्रतिश्ठान दोडामार्गाचे अध्यक्ष संजय सावंत आनी संजय नाटेकार, शाळेची शिक्षिका उत्कर्षा सराफ हांचो मोलाचो आदार मेळ्ळो.
शाळेचे शिक्षक संकेत नायक हांचे संकल्पनेंतल्यान आनी फुडाकारांतल्यान, प्रभारी मुख्याध्यापक धाकटू पाटील हांच्या फुडारपणा खाला हो उपक्रम येसस्वी तरेन चालीक लायलो.
वाहन चालकां कडेन संवाद सादतना, सोरप जर रस्त्याचेर दिसलो जाल्यार गाडी थारावन ताका वाट दिवची, असो थेट संदेश विद्यार्थ्यांनी दिलो. कांय चालकांक विखाळी आनी वीख नाशिल्ले सोरोप हांचे मदलो फरक लेगीत सांगलो. कार्यावळीक रान विभागाचे अधिकारी आनी कर्मचारी हाजीर आशिल्ले. हाजीर आशिल्ल्या मुखेल व्यक्ती मदीं राहुल गाड, विशाल वायंगणकार, समीर सातार्डेकार, सिद्धेश गवस, हुसेन ए. शेख, आर्यन साळकार, अमरेश परवार, शाहू शेळके, अर्जून गांवस, तशेंच प्राणी संरक्षक विराज परवार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
