हांव वड उलयतां

भांगरभूंय | प्रतिनिधी

जाच्या घरा लागसार हांव आसा तो मनीस खरेंच भाग्यवान म्हणपाचो. म्हजे सारको रुख आसल्यार प्राणवाया खातीर भिवपाची गरज ना.

रुख आसतले हजार, पूण म्हजे सारको कोण ना,

अमरत्व दिवपी तुका हे भुंयेर म्हजे बगर कोण ना, 

मानशी जाल्यार देव नाजाल्यार फकत रुख, 

दर सवायशीण पुजता म्हजे दर एक रूप, 

सांग हांव कोण तो वळख म्हजें स्वरूप. 

म्हज्या भुरग्यांनो तुमी वळखलीं म्हाका.. आं.. हय व्हय सारकें. हांव वड.  तुमचो जिवाभावाचो वड. आयज तुमी म्हजी याद काडली न्ही म्हूण आयलों. म्हजी पिराय विचारता रे? आरे! हांव एक असो रुख, जो शेकड्यांनी वर्सा जगता. हांव मनशाची दर एक पिळगी पळयतां. जिविताचे दर एक अणभव म्हजे कडेन आसात. म्हाका कसलीच अपेक्षा ना. फकत तुमकां भरभरून दितां. म्हाका अमरत्वच देवान दिलां, अशें म्हणल्यार अतिताय जावची ना. म्हाका हिंदू धर्मा भितर मोलाचें स्थान आसा. धर्मीक नदरेन खूब म्हत्व आसा म्हाका. आयज म्हजी पुनव. बायलां व्हडा उमेदीन आनी भावार्थान म्हजी पूजा करतलीं. हे म्हजे पुनवेक वडा पुनव अशें म्हणटात.

ही म्हजी पुनव सवायशीण बायल मनयता. सवायशीण बायलां खातीर ही एक व्हड अशी परब. म्हाका सूत रेवडायत प्रदक्षिणा घेत घेत बायलां म्हजी पूजा करतात. तशेंच बाकीच्या सवायशीण बायलांक दोणो वाट्टात. दोण्यांत तरातरांचो फळांचो पनवार घाल्लो आसता. 

म्हजे हे परबे फाटल्यान सावित्री- सत्यवानाची कथा आसा. आपल्या घोवाक बरें आरोग्य आनी आयुष्य मेळचें म्हूण हिंदू बायलां म्हजी पूजा करतात. जेन्ना सावित्रीक कळ्ळें की सत्यवानाचो जीव गेलो म्हूण, ती ताका म्हज्या म्हऱ्यांत घेवन आयली. तिका म्हजें म्हत्व खबर आशिल्लें. बाकीच्या झाडा परस हांव हवेंत चड प्रमाणांत प्राणवाय सोडीत आसता आनी त्या वेळार तिच्या घोवाक प्राणवायुच जाय आशिल्लो. यमान व्हेल्लो सत्यवानचो जीव म्हज्या सकयल ताका परत दिवचो पडलो अशी कथा आसा.

जाच्या घरा लागसार हांव आसा तो मनीस खरेंच भाग्यवान म्हणपाचो. म्हजे सारको रुख आसल्यार प्राणवाया खातीर भिवपाची गरज ना. हांव सावळी दितां, शितळसाण दितां, कालोर करून पयस थंडसाण दिता. भर पावसांत हांव भिजता, खर वतान भाजता. तुमकां दितां पावस, सवण्याची किलबिलाट, म्हजे कडेन केन्ना तरी उलोवन पळय, काळजातले उमाळे गावन पळय.. राख तूं म्हाका, हांव तुका राखतलों.. सैमाचो समतोल सदांच हांव सांबाळटलों.

शिल्पा लाड 

8411007204