भांगरभूंय | प्रतिनिधी
वाराणसी, खबरां संस्था : हांव मुस्लीम कुटुंबांत रावलां. तांचे वांगडा जेवलां पसून, अशें प्रधानमंत्री नरेंद्र मोदी हांणी सांगलें. न्यूज १८ चॅनलांत दिल्ले मुलाखतींत तांणी ही म्हायती दिली. गंगा न्हंयेचे देगेर ही मुलाखत जाली. हालींच नरेंद्र मोदी हांचीं मुस्लिम विरोधी वक्तव्यां आयल्यांत, ते फाटभुंयेर तांची ही मुलाखत म्हत्वाची थारता.
म्हच्या सरकाराचें माॅडेल धर्म वा जातीच्या आदाराचेर मातपसून आदारिल्लें ना, अशें मोदी हांणी मुलाखतींत स्पश्ट केलें. हांव ल्हानपणांत मुस्लीम कुटुंबांत रावलां. म्हजे खूब मुस्लीम इश्ट आसात. पूण २००२ उपरांत म्हजी प्रतिमा खतावपाचे यत्न विरोधकांनी केले. ईद आसताले तेन्ना आमी घरांत केन्नाच रांदप करीनासले. कारण शेजारी मुस्लीम घरांतल्यान आमगेर जेवण येतालें. मोहरमाच्या दिसा आमकां ताजियाच्या सकयल्यान वचपाक शिकयिल्लें. अहमदाबादांत मानेक चौक नांवाचो जागो आसा. थंयचे सगले वेपारी मुस्लीम आनी ग्राहक हिंदू. हांवें कांय लोकांक थंय सर्वेक्षण करपाक धाडले. तातूंतलो एकलो म्हजे विरोधांत उलयलो. तेन्ना दुकानदारान ताका सोमतोच आडायलो आनी सांगलें, मोदीं आड एक उतर पसून उलोवं नाका. तांकां लागून म्हजीं भुरगीं शाळेंत वतात. थंयच्या ९० टक्के दुकानदारांचें म्हणणें अशेंच आशिल्ले, अशें मोदीन सांगलें.
म्हजे जिणेंत असल्यो बऱ्योच गजाली घडल्यात. पूण हांव त्या सगल्यांची केन्नाच जायरात करीना. हांव व्होट बँके खातीर काम करीना. जर कितें चुकीचें आसा जाल्यार हांव तें चुकीचें अशें म्हणटलो. जेन्ना हांव हिंदू- मुस्लीम करपाक लागतलों, तेन्ना हांव भौशीक जिणेंत रावपाक योग्य आसचो ना. हांव हिंदू- मुस्लीम फूट घालचो ना. कारण तें म्हजें भावपण, अशेंय मोदी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
