भांगरभूंय | प्रतिनिधी
बाबूश हांकांय हिंदू धर्म आवडटा; संजीय देसाय हांचें कडल्यान स्पश्ट
पणजी: आमचीं मुळां तपाशीत जाल्यार आमी मुळचे हिंदूच. उपरांत धर्मांतरीत जाले. ही गजाल केन्नाच बदलूंक शकना अशें उलोवप येरादारी मंत्री मॉवीन गुदिन्हो हांणी दाबोळे एके कार्यावळींत उलयतना केलें. जाल्यार बाबूश मोंसेरात हांकांय हिंदू धर्म आवडत आशिल्ल्याचें पणजेचे अस्तंते मंडळ अध्यक्ष संजीव देसाय हांणी स्पश्ट केलें.
दाबोळेच्या नव्या मंडळ अध्यक्षांचे नेमणुके उपरांत मंत्री गुदिन्हो हांणी कार्यकर्त्यां कडेन संवाद सादतना आपल्या 45 वर्सांतल्या राजकी घडामोडींचो नियाळ घेतलो. 1980 सावनच्या दरेक वेंचणुकांनी खूबशा जाणांनी म्हाका हारोवपाचो यत्न केलो. हांव क्रिस्तांव आशिल्ल्यान आदले प्रधानमंत्री सर्गेस्त राजीव गांधी हांणी एका विधानसभा वेंचणुकेंत कुठ्ठाळे बदला सांत आंद्रें मतदारसंघांतल्यान वेंचणूक लडोवपाचो सल्लो दिल्लो. तांचो सल्लो न्हयकारून आपणें कुठ्ठाळींतल्यान वेंचणूक लडोवपाचें आव्हान स्विकारलें, आनी ती वेंचणूक जिखलों.
दोबाळेंतल्यान वेंचणूक लडोवपाचो निर्णय घेतले उपरांत आपूण हारतलों अशें खूबशा जाणांक दिसतालें. दाबोळे 70 टक्क्यां परस चड हिंदू आशिल्ल्यान थंय आपूण तिगचो ना अशें तांचें मत आशिल्लें. हाचो फायदो उठोवपा खातीर सुदिन ढवळीकार हांणी लेगीत यत्न केल्ले. पूण हांवूच जैतिवंत जालों. म्हजो हिंदूं कडेन लागींचे संबंद आसात. म्हजीं मुळां सोदीत जाल्यार हांव मुळचो हिंदूच आसा. उपरांत धर्मांतरीत जालों. पूण, हांव हिंदू आशिल्ल्याची गजाल बदलूंक शकना अशें गुदिन्हो हांणी म्हणलें.
चडांत चड हिंदू मतां आशिल्ल्या मांद्रें, दिवचल ह्या मतदारसंघांतल्या लोकां कडेन लेगीत म्हजे लागींचे संबंद आसात. ताका लागून ह्या मतदारसंघांनी लेगीत हांव जिखूंक शकतां असो दावोय तांणी केलो.
बाबूश लेगीत हिंदू धर्मियांक मजत करतात
मंत्री तशेंच पणजीचे आमदार बाबूश मोंसेरात हांकां लेगीत हिंदू धर्म आवडटा. हिंदू धर्मियां प्रमाणूच बाबूश लेगीत सदांच मजती खातीर तयार आसतात. हिंदू आनी क्रिस्तांव ह्या दोनूय धर्मांतल्या नागरिकांक बाबूश मजत करीत आसतात अशें पणजी भाजप मंडळाचे आदले अध्यक्ष संजीव देसाय हांणी आयतारा पणजेंतले एके कार्यावळींत उलयतना सांगलें.
प्रदेशाध्यक्षपद तानावडे हांचे कडेनूच जाय: मॉवीन
प्रदेशाध्यक्षपदा खातीर प्रदेश भाजपान आदले मंत्री दयानंद मांद्रेंकार, दिलीप परुळेकार, चंद्रकांत कवळेंकार, आदले खासदार नरेंद्र सावयकार, आदले आमदार दामू नायक आनी दयानंद सोपटे हांचीं नांवां पक्षश्रेश्ठीं कडेन धाडल्यांत. पूण भाजप प्रदेशाध्यक्षपदा खातीर सद्या एकूय मनीस पात्र ना. प्रदेशाध्यक्षपदाची जापसालदारकी पक्षान सदानंद तानावडे हांचे कडेनूच दवरूंक जाय. नाजाल्यार येता ते विधानसभा वेंचणुकेंत पक्षाक त्रास सोंसचो पडुये. हे विशीं आपूण वरिश्ठ फुडाऱ्यां कडेन उलयतलों अशें मंत्री मॉवीन गुदिन्हो हांणी पत्रकारां कडेन उलयतना स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
