भांगरभूंय | प्रतिनिधी
पणजी : हांव गोंयांत येतलों ही फकत वावडी आशिल्ली. केरळाचे नवे राज्यपाल म्हणू निवड जाल्ल्यान ही फकत वावडी आशिल्ल्याचे स्पश्ट जाला, अशें राजेंद्र आर्लेकार हांणी सांगलें. बुधवारा तांणी गोंयचे राज्यपाल पी. एस. श्रीधरन पिल्लई हांची भेट घेवन वेगवेगळ्या विशयांचेर चर्चा केली. ते उपरांत ते पत्रकारां कडेन उलयताले.
गोंयच्या मुख्यमंत्री पदा खातीर आपणाक ऑफर नाशिल्ली, अशें आर्लेकार हांणी सांगलें. गोंयांत हांव खंयच्याच राजकी पदाचेर लढो दिना. राज्यपाल पिल्लई मुळांत केरळाचे आशिल्ल्यान तांचे कडेन केरळ विशीं चर्चा केली. राज्यपाल ह्या नात्यान तांची गोंयांतल्या वेगवेगळ्या घडणुकांचेर नदर आसा. ताचेर टिपण्णी करपाची गरज ना. गोंयांतल्या आनीक खंयच्याच विशयाचेर चर्चा करूंक ना, अशें आर्लेकार हांणी सांगलें.
अापूण राज्यपाल म्हूण केरळाची म्हायती राज्यपाल पिल्लई हांचे कडल्यान घेतली. थंय वेगवेगळ्या गजालीं विशीं तांचीं मतां जाणून घेतली. गोंय भशेन केरळांतय पर्यटन क्षेत्रांत उदरगत जाल्ली आसा. पिल्लई हांणी केरळांतल्या पर्यटन आनी अर्थवेवस्थे विशीं म्हायती दिली. गोंय भशेन केरळय म्हजें. हांव थंय कोणाकूच शिकोवपाक वा आज्ञा करपाक वचूंक ना. थंयच्या सरकाराक तांच्या वावरांत हांव मजत करतलो.
————
आर्लेकार हे विद्वान आनी संविधानाक बांदील मनीस, अशें राज्यपाल पिल्लई हांणी सांगलें. ते सगळ्यांक न्याय दितले हाची म्हाका खात्री आसा. ताची नेमणूक केरळा खातीर भेट थारतली. गोंय आनी केरळ हांगा जायत्यो गजाली समान आसात. म्हज्या काळांत गोंय राजभवनाक लोकभवन करपाचो यत्न केलो. रोखडीच आमी राजभवना वरवीं गरजेवंत लोकांक जेवण आनी कपडे दिवपाची येवजण आंखतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
