भांगरभूंय | प्रतिनिधी
म्हज्या दोळ्यांत काय वर्सां पयलींच्यो गजाली याद करपाची प्रक्रिया सुरू जाल्ल्याचें ताका कळ्ळें आसुंये. अचकित 1997 उपरांतची जीण याद जाली.
हांव ते दीस सांजेच्या वेळार असोच बशिल्लों. आमोरेचो वेळ, दिवे लावप सुरू जाल्ले.. इतक्यात आमच्या व्हरांड्याक लागून आशिल्ले येरदारीच्या रस्त्याचेर म्हाका “तो” दिश्टी पडलो. तो सादरण 48 ते 50 वर्सा पिरायेचो दादलो.. तरणाटोच. तारणाटो हे खातीर कारण इतकी पिराय दिसत आसूनय ताचे दोळे म्हाका पळोवन एका वेगळेच उमेदीन चमकताले, म्हजे कडेन पळयताले. खाड आनी केस वाडिल्ले, कपडे सामके ओबड धोबड, पिंजलेले आनी घाणीन माखलेले, पॅन्ट पिजकी आनी कुडीचेर घांवे, घाण आनी रक्त. घरातल्यो अस्तुऱ्यो भिवुन, किळांच मारून भितर गेल्यो. तो म्हजें कडेन पळयत एके आशेन म्हजेकडेन आयलो.
“कोण तू?” हांवें विचारलें. “आरे, म्हाका विसरलो? हांव मार्ग. रस्तो. रोड. नॅशनल हायवे. तुज्या गांवांत तुका व्हरपी सर्व्हिस रोड.” म्हज्या दोळ्यांत काय वर्सां पयलींच्यो गजाली याद करपाची प्रक्रिया सुरू जाल्ल्याचें ताका कळ्ळें आसुंये. अचकित 1997 उपरांतची जीण याद जाली. म्हजे विचार वळखून तो उलोवपाक लागलो. “हय, बरोबर रे शाण्या. हांव तोच. तुका मेळिल्लों पळय. 1998 सालांत. एका कोकणी म्हयन्याळ्यांत वा रस्त्या विशीं जागृताय घडोवपी एका विशेषांकात. कोणेतरी एका कोंकणी लेखकान म्हजे वेदनेक वाट करून दिल्ली. तेन्ना शरीराचेर आशिल्ल्यो ते फक्त लोकांचे शेंबूड, थुंकी, पान, चुनो, तंबाखू खावन थुकलेले दाग, कोयर, भाज्यांचो आनी खावपाचे जिनसाचो कोयर आनी केन्नातरी जाल्ले भिरांकुळ अपघातांत मरण पाविल्ल्यांचें रक्त. आनी आयज? आयज म्हजी कुड पुराय रक्तान भरिल्ली आसा. म्हजें शरीर रक्तबंबाळ आसा. हे रक्त कोणाचें? तुमचें मनशांचें. तुमी येरादारी नेम पाळीनात. फाटल्यान वाग लागलेल्या भशेन वा खंयतरी उजो लागिल्ले भशेन गावठी जेम्स बॉन्ड ना जाल्यार हॉलिवूड सिनेमातलो टॉम क्रुझ कशे दोन चाकी आनी चार चाकी वाहनां पेटयत व्हरतात. ट्राफिक सिग्नलाचेर तुमकां पाशियेंस आसना. येरादारीचे नेम तुमी बोल्सांत घाल्ले भशेन मनमानी करून मेळटा तशे “ओव्हर स्पीडिंग” करून गाडी धांवडयतात. ट्रॅफिक पुलीस बाबडो भिवुन भिवुन ड्युटी करता आनी तुमची चूक आसल्यार ताणें तुमका आडायलें जाल्यार चूक मान्य करपा सोडून तुमी ताकाच शापोता सांगपाक लागतात. “चाचा विधायक है हमारे” ह्या थाटात खंयचो आमदार, मंत्री आपले कितले वळखीचो वा कितलो “क्लोज” आसा हें दाखोवपाक ताचे फुडल्यानच ताका फोन मारतात आनी भंय घालून आपली सुटका करुंक पळयतात.
ऐपत नासतना आनी वाहन चलोपाची लायकी नासतना आपल्या एकुलत्यास लाडाच्या, गुणाच्या चल्याक तुमचे मदलो एक बापूय रीण काडून हायफाय मोटरबायक घेवन दिता ना जाल्यार “केटीएम”. आनी तो मिश्यो फुटूंक नाशिल्लो, जीण किते, संघर्श कितें हाचो अणभव घेवंक नाशिल्लो भुरगो चलयांचेर वा हेर इश्टांचेर स्टायल आनी शायनिंग मारपाक रेसिंग करता आनी एक दीस भिरांकूळ अपघात जावन जीवाचो घात जाता. तुमी मनीस केन्ना जागे जातले? दोन वर्सां पयलीं, कामावेल्यान घरा येतना रातच्या वेळार तुवें फर्मागुडीयेर जाल्लो अपघात पळयल्लो. त्या तरणाट्याचे पोटाचेर ट्रकाचो टायर वचून ताचे अवयव शरीराभायर लोंबकळटाले आनी कंबरे सकयले हेर अवयव आनी पाय कायमचे अधू जाल्ले, तुवें पळयिल्ले आनी तुवें तशेच विमनस्क आनी भेदरलेल्या अवस्थेंत तू ज्या दिसाळ्याक काम करता थंय बातमी धाडिल्ली याद आसा?”
हावेन “हय ” म्हणटगीत तो फुडें उलयलो, ” ते घडणूकी उपरांत तू फुडले 5 दिस शांततायेन न्हिदुंक ना, हें वूय म्हाका खबर आसा. आरे सरकार, प्रशासकी वेवस्था, पुलीस, समाजीक संस्था ह्यो सगल्यो कितें करतल्यो, तुजे हें स्वताक देडशाणे म्हणपी मनशांची तकली जाग्यार ना जाल्यार? ” गोवा रोड सेफ्टी फोरम”/ जीआरएसएफचे दिलीप नायक आनी “पीपल ऑफ फोंडा” चे प्रमोद सावंत, डॉ रघुनंदन कितले म्हूण जागृताय करतले? फोंडा शाराचो एखादो सप्रे उलयतलो, पणजे, सांताक्रुजांतलो एखादो अडवलपालकार गंभीरतायेंन कॅमेरा फुडल्यान विशय मांडटोलो, ताळगावचे एखादे बाय सेसिल डान्स करपा सोडून म्हजो विशय म्हजी कशी दुर्दशा जाल्या ते सायन्स विशयांतले प्रात्यक्षिक दाखयिल्ले भशेन रस्त्याची दुर्दशा मांडटलें. ना जाल्यार वास्को, मुरगाव भागांतलो एखादो पोळजी भगवान शंकराचे तांडव नृत्य करून, थयथयाट तरी करून म्हजे वयल्यान वाहनां चलोवप कितले धोकादायक जाला, अधिकारी कितें करतात म्हूण लक्ष वेधून घेतलो. पुण कितले म्हूण? केन्ना मेरेन? तुमका मनशांक लागून हांणी स्वताची अशी धजा आनी तमाशा कितले मेरेन करपाचो? हें सगलें ते कित्याक लागून करतात? तुज्या सगल्या मनशांक लागून. सारके मरे? कितें रे?
आयज रस्त्यांचेर गोंयांत जितके बळी वतात, तांची सरासरी राष्ट्रीय पावंड्यावेल्या अपघाती बळींच्या आकड्यां परस चड आसात. हे सामाजिक कार्यकर्ते आनी सामाजिक संस्थांचे प्रतिनिधी तुमकां लागून कितले छाती फोडून आड्डतले? तुज्या लोकांक अक्कल केन्ना येतली? कोणतरी शेट मांद्रेकार शाळा कॉलेजांनी वचून येरादारी नेमांचे विशयाचेर “गेस्ट लेक्चर” दिवन जागृताय करतलो. पूण हेच तरणाटे भुरगे हेच नियम धाब्याचेर बसोवन आपल्याक जाय तशे दोनचाकी वाहनां धांवडांवक लागले जाल्यार आवय बापायन तांकां समजावप, वेळ प्रसंग आयलो जाल्यार गाडयेची चावी काडुन घेवप हें तांचें कर्तव्य न्हय? हे सामाजिक कार्यकर्ते, पुलीस अधिकारी आनी प्रसंगी मंत्री पसून तुज्या लोकांक कितले समजायतले? तांका घरा कडेन फामिल आसा. “द फॅमिली मॅन” सिरीजांतल्या श्रीकांत तिवारी भशेन तांकाय कुटुंब आसा. तेवूय फॅमिली मॅन आसात. तुज्या गोंयच्या काय बोंडेर लोकां फाटल्यान ते कितले धांवतले रे? वर्स सोंपलें हें पळय. दर वर्सा ऑक्टोबर, नोव्हेंबर आनी डिसेंबर म्हयन्यात गोयांत भिरांकूळ अपघातांची संख्या वाडटा हें तुवुय पळेयता आनी हांवय बी. टेंडरां काडून काडुन तुमी म्हजी दशा कितें करून दवरल्या ते आनी वेगळे सांगपाक नाका. हे अशे अवस्थेत हांव हांगा येयलो तेन्ना तुज्या घरांतलीं बायलां भुरगी कशीं धांवून भितर गेलीं पळयलें मरे? मातसो विचार कर आनी तुज्या गोंयच्या लोकांकय बी सांग विचार कर म्हणून. चल येता.” ….
…अशे म्हणून तो तसोच म्हेळिल्ल्या कपड्यांनी, रक्तबंबाळ शरीरान महाभारत महाकाव्यांतल्या अश्वत्थामा सारको चालपाक लागलो. म्हज्या तोंडांतल्यान उतरच सुटलें ना. हांव पळयतच उरलों, ताच्या रक्तान माखलेल्या ओबड धोबड शरीरा कडेन.
सनतकुमार फडते
7020438469
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
