भांगरभूंय | प्रतिनिधी
लंडन, खबरां संस्था ः जम्मू- काश्मीरांतल्या समाजीक वावुरपी आनी पत्रकार याना मीर हांचो यूकेच्या संसदेत डायव्हर्सिटी एम्बेसेडर पुरस्कारान भोवमान केलो. हे कार्यावळींत याना मीर हांणी जम्मू- काश्मीरा आड जावपी प्रचाराचो प्रतिकार करपी सशक्त भाशण केलें. हें भाशण आतां सोशल मिडियाचेर व्हायरल जावपाक लागलां. ह्या व्हिडियोंत ताणें पाकिस्तान आनी मलाला युसुफझाईचेर अप्रत्यक्षपणान हल्लो केला.
युकेतल्या जम्मू- काश्मीर स्टडी केंद्रान आयोजीत केल्ल्या कार्यावळींत याना मीर हांणी सांगलें, ‘हांव मलाला युसुफझाई न्हय. कारण भारताचो एक भाग आशिल्ल्या म्हज्या मायभूंय काश्मीरांत हांव सुरक्षीत आनी स्वतंत्र आसा. हांवें म्हज्या मूळ देशांतल्यान पळून तुमच्या देशांत (युके) आलाशिरो घेतिल्लो ना. हांव केन्नाच मलाला युसुफझाई जावंक शकना.’
याना मीर हांणी फुडें सांगलें, ‘सोशल मिडिया आनी परदेशी मिडियातल्या सगळ्या टूलकिट वांगड्यांचेर हांव हरकत घेता, जे भारतांतल्या काश्मीराक भेट दिवपाची केन्नाच पर्वा केली ना पूण जुलूमाच्यो काणयो घडयल्यो. धर्माच्या आदाराचेर भारतीयांक ध्रुवीकरण करप बंद करचें अशी विनवणी हांव करता. आमी तुमकां आमचे कुडके करपाक दिवचे नात’, अशी तिणें पाकिस्तानाक खर उतरांनी शिटकावणी दिली. तशेंच आमच्या फाटल्यान येवप बंद करात आनी म्हज्या काश्मीरी समाजाक शांततायेन जगपाक दिवचें अशेंय तिणें सांगलें.
म्हज्या देशाची बदनामी करप बंद करात…
जम्मू- काश्मीर स्टडी सेंटर (JKSC), युकेन लंडनातल्या संसदेच्या हाऊस ऑफ कॉमन्स हांगा ‘भारताचो संकल्प दीस’ घडोवन हाडलो. JKSC ही जम्मू-काश्मीर आनी भोंवतणच्या समस्यांचो अभ्यास करपी थिंक टँक जावन आसा. याना मीर ‘संकल्प दिसा’ च्या आपल्या भाशणांत उलयतालीं. युके आनी पाकिस्तानांत रावपी गुन्यांवकार आंतरराष्ट्रीय माध्यमांनी आनी मानवी हक्क मंचाचेर म्हज्या देशाची बदनामी करप बंद करात. आमच्या फाटल्यान येवप बंद करात. हजारांनी काश्मीरी आवयनी आतंकवादाच्या कृत्यांक लागून आपले पूत वगडायल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
