भांगरभूंय | प्रतिनिधी
आयज काल तुमी तुमका रिचार्ज करचें सोडून म्हाकाच रिचार्ज करपाक लागल्यात. तुमच्या नात्यांक चार्जिंग करचें सोडून तुमी म्हाकाच चार्ज करपाक लागल्यात.
म्हाका तुमीं सगलीं जाणां वळखतात आसतलीं न्हय? हय. म्हजे नांव फोन. कांय जाणां म्हाका फोन म्हण्टात, तर कांय जाणां म्हाका मोबायल, तर थोडीं म्हाका सेल वा स्मार्ट फोन म्हूण वळखतात.
हाव सगळ्यांचे सामको गरजेचो. हांव तुमचे भशेनच, जसो बरो तसोच वायट पसून. आख्या देशभर कोणाचोच वापर करिना तितलो वापर म्हजोच तुमी करतात. तो मागीर, जावं गिरेस्त ,जावं गरीब हांव सगळ्यांगेर आसताच. हांव कितलोय म्हारग आसूं वा कितलोय सवाय, तरी हांव लोकांक जायच. सकाळीं उठून देवाक पांया पडचें सोडून, पयलीं तुमी म्हजेंच दर्शन घेतात.
आयज काल दुसऱ्यांगेर वच्चें सांडून तुमी म्हजो वापर करुन म्हजेरूच दुसऱ्याची खबर घेवपाक लागल्यात.
पोस्ट ऑफिसांत वच्चें सांडून तुमी म्हजोच वापर करुन म्हाजेरुच चिट् बरोवन दुसऱ्याक धाडपाक लागल्यात.
हाव ना जाल्यार ल्हान भुरग्यांचा पोटांत जेवणूच वचना. एकमेकांकडेन उलोवपाक तुमकां वेळ नाच… पूण म्हजो वापर करुन म्हाका बरो हातान घेवन बसपाक मात तुमका सगळ्यांक वेळ आसतात. म्हजे व्हाॅट्सअॅप, फेसबुक अशें कितलेशेच इश्ट आसात. तर, तुमी आपल्या इश्टाक विसरून म्हज्या इश्टां वांगडा दोस्ती केल्या.
आयज काल तुमी तुमका रिचार्ज करचें सोडून म्हाकाच रिचार्ज करपाक लागल्यात. तुमच्या नात्यांक चार्जिंग करचें सोडून तुमी म्हाकाच चार्ज करपाक लागल्यात. तुमी मातूय तुमचे तकलेर वजें घालिनासताना म्हज्या गुगल इश्टाचेर वजें घालीत आसात. तुमी तुमच्या सोयऱ्यांगेर तांकां वचून पळयनासतना, म्हजेर व्हिडियो कॉल करुनुच तांकां पळयत आसा. रस्त्यार एकादो एक्सिडंट जालो जाल्यार त्या मनशांक उखलपाचो सोडून तुमी म्हजेंर पयलीं फोटो मारून सगळ्यांक कळीत करतात. कोणाकूच त्या मनशांचें पडिल्लें नासतात.
तुमच्या कडेन हांव आसा म्हूण तुमी तुमची जाय तीं कामां आॅनलायन करुक शकतात, तुमच्यो आवडीच्यो वस्तू विकत घेवंक शकतात, हातान पयशे नासतना तुमी म्हाका वापरुन दुसऱ्यांक जी- पे करपाक शकतात.
आयज काल तुमी नव्यो- नव्यो गजाली म्हजे कडेन आशिल्ला यु -ट्यूबार पळोवन शिकत आसात. कांय बऱ्यो गजाली तर कांय वायटूय गजाली शिकतात.
तुमच्या फामिलींत कितलींशींच जाणा लंडन, अमेरिका ह्या सारक्या पयसुल्ल्या देशांनी रावतात. तुमचे कडेन हांव आसा म्हूण तुमी तांची दिसान दीस खबर घेवंक शकतात. मनशांनो , तुमी तुमच्या आवय- बापायक, इश्ट – इश्टीणींक विसरून म्हाका तुमचो घट्ट इश्ट केला. जंय म्हजी चड गरज आसा, थंय म्हजो वापर करात.
नाका थंय म्हजो वापर करुन तुमचो वेळ पिड्ड्यार करूं नाकात.
– स्नेहल कारबोटकार
93733 79263
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
