भांगरभूंय | प्रतिनिधी
ज्या सगळ्यां मोगाळ इश्टांक, म्हजो नमस्कार! तुमच्यानी म्हणूं येता, आयज म्हाका कितें सांगपाचें आसा. हांव आयज कितें सांगपाक आयलां? घडये तुमकां हो प्रस्न पडला आसतलो. तुमकां दिसता आसतलें चवथ जाली, दसरो जालो, दिवाळीय जाली, पूण हांव अजून पडटां. नोव्हेंबर आयलो तरी हांव तुमची फाट सोडिना.जून-जुलय म्हयनो सुरू जाला अशें दिसता आसतलें तुमकां. तशें दिसतलेंच .म्हजे दीस सोंपले तरी हांव वचना. तुमच्या दोळ्यां मुखार जायते प्रस्न उप्रासले आसतले. आयज जायते व्हिडियोय म्हजेर व्हायरल जावपाक लागल्यात. चवथ जावन गेली, दसरो जावन गेलो, दिवाळी जावन गेली, आतां ३१ डिसेंबराक पार्टी करूनच वतलो काय कितें? म्हजेर अशें जायते व्हिडियो व्हायरल जावपाक लागल्यात. हाचेर हांवूंय हांसतां आनी हांसतलोंच.
कितें? कितें म्हणटा? आमकां त्रास दिवंक नाका. आतां तरी आमकां सुशेग दी. भुरग्यांक सुटयेचो आनंद घेवंक दिवचो. तांकां खेळूंक दिवचें. वा! अशें म्हणटा तूं. तुजे बरोबर आसा पूण खरें सांगूं, तुमकां त्रास दिवपाक म्हाका मात लेगीत आवडना. हांव जाणां तुमकां म्हजे खातीर खूब त्रास जाता हें म्हाका खबर आसा आनी आतां तर दिवाळेची सुटी आशिल्ल्यान तुमकां भोंवपाची उमळशीक आसा हेंय म्हाका कळटा. म्हजे खातीर म्हज्या शेतकार भावांक जायत्यां समस्यांक तोंड दिवचें पडटा आनी जायतें कश्ट पडटा. पूण म्हज्या मोगाळ इश्टानो हांव कितें करूं, हो म्हजो नाईलाज.
कितें…? कितें म्हणटा? कित्याक काय? कसलो नाईलाज काय म्हणटा? इश्टांनो , हें पळयात म्हाका उलोवपाची इत्सा ना पूण तूमी विचारता म्हणून सांगू शे दिसता. हें पळयात म्हाका खरेंच भिरांत दिसता कित्याक तर कांय जाण म्हज्या भांगरांळ्या गोंयच्या सैमाचो इबाड करूंक रावल्यात. दोंगर कापून घरां आनी व्हड व्हडले बंगले बांदपाक लागल्या. कांय जाण व्हडले प्रकल्प बांदून ह्या सैमाचो इबाड करपाक पळयता. तुमकां खबर आसतलीच, आयज वचत थंय काँक्रीटाची रानां उबी रावल्यांत. आनी हें सगळें अशेंच जर चलत रावलें जाल्यार गोंयची सोबीतकाय काबार जावपान कळाव लागचो ना. तेवटेन थंय पळयल्यार तुमची सगल्यांची म्हादय आवय आपलें अस्तित्व तिगोवन दवरपाक धडतडटा. कित्याकतर, कांय जाण हांव वतकूच म्हादय आवयक आपली करपाची वाट पळयता. म्हज्या भांगराळ्या गोंयची अशी वाट लागता ती पळोवंक म्हज्यान जायना. म्हादय आवयक कोण हात लायता तें हांव पळोवक शकना. जर समजा म्हादय आवय कोणें व्हेली जाल्या तुमचें कितें? त्या मोन्या जिवाचें कितें जातलें? ताकाच लागून म्हजे दीस सोंपले तरी, तुमकां म्हजो त्रास जाता तरी म्हाका वचपाची इत्सा ना.
हांव फकत देवा कडेन मागतां की म्हज्या सैमाची जतनाय घेवपी लोक निर्माण करचे. तांकां गोयच्या सैमाची राखण करपाची
बुद्द दिवची. तांकां बळगें दिवचें. झाडांक खंयच्याय हानीपसून राखण दिवची आनी
तांची जतनाय घेवची हे विचार तांच्या मनांत घालचे.
म्हादयचें म्हत्व आनी तांचें संवर्धन हांचे विशीं लोकांक जाणविकाय करपाची गरज आसा हें लोकांचे तकलेंत घाल. झाडां कापपा पासून वाटावप, जाका लागून सैमीक संकश्टांपसून राखण करपाक आनी पर्यावरण सुदारपाक मदत जातली, पर्यावरणाची राखण करपाक आदार करप ही एक बरी संवय सगळ्यांक लाय.गोंयचो सोबीत सैम वाचवप,प्लास्टीकाचो वापर उणो करप, कोयर योग्य सुवातेर विलो लावप, पर्यावरणाक अनुकूल पर्यटनाक चालना दिवप गोंयचो सैम वाटावपा खातीर आमकां बेकायदेशीर झाडां कापप बंद करचें पडटलें ही भाशा तांका शिकय. वता वता एकूच सांगन दिसता बेकायदेशीर झाडां कापप बंद करात आनी रानां सांबाळपा खातीर खर पावलां उबारात. म्हादय आवयची राखण करपाक पावलां मारात.
इश्टांनो, दर दिसा सकारात्मक
विचारांनी सुरवात करात. नकारात्मक
विचार आनी लोकां पासून पयस रावात. स्वताचो आनी दुसऱ्यांचो मोग करपाक शिकात. कुटुंब, इश्ट आनी नात्यांतल्या लोकां वांगडा वेळ घालात.
आस बाळगिता की तुमी म्हाका
समजावन घेतले. उलोपाचे खूब आसा पूण आसू आनी चड कांय उलयना. हांवय जाणा हें दीस म्हजे न्हय. म्हज्यानूय आतां चड उलोवंक जायना. बरें तर! वतां हां. म्हजी उतरां आयकून घेतलीं म्हूण काळजांतल्यान तुमकां सगळ्यांक देव बरे करूं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
