भांगरभूंय | प्रतिनिधी
नमस्कार, हांव आत्मो… हय तुमचे संस्कृतायेचो आत्मो. कितें, कित्याक आयला काय म्हणून विचारता? तुमच्या भारत देशाचे संस्कृतायेची वळख तुमकां करूंक आयला. हे… तूं! हय व्हय तूंच!! हांवें आयकलां तुवें तुजे बायलेचें आयकून तुज्या आवय-बापायक वृद्धाश्रमांत दवरल्या म्हणून. हय? कित्याक रे पूण? जाणटी जाल्यात म्हणून? आरे आवय बापूय जाणटी जाली म्हाणून तांकां एकली सोडप रे? तांची आपली मनशां आसूनय तांणी एकसुरी रावप. कित्याक? आरे जें आवयन तुका पालवा पोंदा दवरून आपल्या हड्ड्यांतले दूद पिवयलें, बापायच्या बोटाक धरून तूं चलूंक शिकलो. आपल्या सगल्या सुखाचो त्याग करून तांणी तुका सुखांत वाडयलो, त्या आवय-बापायक तूं दुख्खांत दवरता?
कश्टाच्या दोंगराक माथें मारून, रातीचे दीस करून तुका शिकयलो. स्वताच्या पांयार उबो रावपाचें बळगें दिलें. त्या आवय- बापायक आतां तुजी चड गरज आसा तांकां तूं घरा भायर काडटा. खंय गेले रे तुजें मनीसपण? आपल्या आवय- बापायचे वेंगेंत सर्ग आसता. आवय- बापूय हे देवा सारकें आसतात. हें कशें कळना तुका? कितें हीच रे ती तुमच्या भारत देशाची संस्कृती?
आनी तूं रे… राती मोट्या आवाजान वाजप कित्याक लायिल्लें रे तुवें? कितें संगीत तें…? कितें कितें तुका संगिताचो चड मोग…? हु.. डिजे, राॅक, डिस्को हें कसलें संगीत? ज्या संगितान दुसर्याक त्रास जातात, दुसर्याची न्हीद पिड्ड्यार जाता तें सांगीत न्हय. खरें संगीत जे दुसर्याक खोशी दिता तें, जे आयकून मन संतुश्ट जाता तें खरें सांगीत. अभंग गायन, भक्तीगितां, भावगितां हें संगिताचें खाशेलपण. पूण तें आतां शेणत चल्ला कित्याक? आतां वचत थंय राॅक आनी डिस्को चल्ला. तुमचे लोकनृत्य, परंपरीक फुगडी, धालो ह्या सारकिल्ले नाच ते आतां कमी जायत आसात. मानता हांव की संवसार बदल्ला पूण कांय गजाली बदलूक फावनात. तुमच्या देशाची संस्कृती तुमी विसरूंक फावना तुमच्या पुर्वजांचें दायज तुमीच सांबाळूक जाय. हें जाणा न्हय तुमी?
नातर तांकां पळयात रे. आपली संस्कृती सांबाळून ते आतां दुसर्याचीय संस्कृती आपणावंक लागल्यात. तुमची संस्कृती तांणी आपली केली. तुमचें आयुर्वेद ते आतां आपलें म्हणटात, तुमच्या योगी मुनिनी अस्तित्वांत हाडिल्लो योगा ते आपलो म्हणटात कित्याक? कित्याक तर तुमकां ताची कदर ना. तुमची भजन गायनां ते शिकले, तुमच्या देवी- देवाच्यो आरत्यो तांकां पाठ आसात. तांकां तुमचे मोलादीक संस्कृतायेची जाण जाल्या, तुमच्या पुर्वजाची ती गिरेस्तकाय आतां ते सांबाळूक पळयता, पूण तुमकां ताचे पडिल्लें ना. हें अशें कित्याक जाता कोण सांगूक शकता?
ते आपले संस्कृतीचो बरे तरेन सांबाळ करतात. पूण तुमी… तुमी कांय जाण आपली संस्कृती विसरून, तांची घेवन नाचतात! प्रत्येक वेळार विश् यू हॅप्पी, हॅप्पी बर्थ डे, हॅप्पी दसरा, हॅप्पी दिवाळी. थॅंक् आनी साॅरी. हें कित्याक? कितें तुमकां वाडदिसाचीं परबीं म्हणूंक येना? दसर्याची परबीं अशें म्हणूंक येना? देव बरो दीस दिवं, बरी रात मेळूं समेस्तांक अशें म्हणपाक लज दिसता? दिवाळीच्यो शुभेत्सा अशें कित्याक म्हणिनात. ‘जय श्री राम’ ह्या सारकी सोबीत सुंदर उतरावळ तुमकां कित्याक
नाका?
भारत हो तुमचो देश, संस्कृती प्रदान देश. तुमच्या देशाची संस्कृती तुमीच सांबाळूक जाय. हांव तुमचे संस्कृतायेचो आत्मो आयज असो वेर्थ भोंवता. म्हाका तुमचे संस्कृतायेंत बांदून दवरात, राखून दवरात आनी हें फक्त तुमच्याच हातांत आसा. येता हांव…!
अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
